Бул абырайлы беллесиўлер тек бириншилик ушын гүрес емес, терең философиялық тәрбия ҳәм мәнаўият әнжуманы сыпатында да өткенин атап өтиў керек. Қызғын руўхтағы жарыслар ул-қызларымыз арасында өз-ара ҳүрмет ҳәм дослық орталығын және де беккемлеп, олардың спорт ҳәм турмыс ҳаққындағы билимлерин, Ўатанға муҳаббат ҳәм садықлық сезимин арттырғаны, әсиресе, әҳмийетли болып есапланады.
Бул ойынлар Жаңа Өзбекстанда олимпия ҳәрекетин және де раўажландырыў бағдарында пүткиллей жаңаша қатнас ҳәм миллий тәжирийбе тийкарында тасланған үлкен әмелий қәдем сыпатында да айрықша әҳмийетке ийе.
Ең әҳмийетлиси, бул система жеңиске қуштар, күш-ғайратлы ҳәм талапшаң мыңлаған спортшы жасларымыз ушын үлкен имканиятлар майданына айланбақта, аймақларымыз арасында саламат бәсеки орталығын қәлиплестирмекте.
Еки ҳәптеден аслам ўақыт даўамында болып өткен маўасасыз беллесиўлерде атап өтилген жоқары нәтийже ҳәм рекордлар жарысларға болған қызығыўшылықты және де арттырды.
Әсиресе, қашқадәрьялы қызымыз Кумуш Кучкинова беккем ерк-ықрар көрсетип, бир ўақыттың өзинде спорттың еки түри – дзюдо ҳәм гүрес бойынша алтын медалларды қолға киргизип, өз ықласбентлерине жарқын толқынландырыўшы минутларды усынды.
Қызғын беллесиўлерде және бир қатар жасларымыз да рекорд нәтийжелерге ерисип, Жаңа Өзбекстанда қандай қәбилетли әўлад жетисип киятырғанын көрсетти. Атап айтқанда, Ташкент ўәлаятының ўәкили – аўыр атлетикашы қызымыз Муштарий Ўролова 60 килограммнан жоқары салмақ категориясында дәс көтериўде 109 килограмм, силтеп көтериўде 136 ҳәм еки гүрес жуўмағы бойынша 245 килограмм нәтийже менен жәҳән рекордын орнатқанын, Шердор Ешполатов, Икром Мўминбоев, Беҳруз Ҳасанов, Солиҳа Баҳодирова, Дилфуза Йўлдошева, Зуҳра Иброҳимова болса усы бағдарда Өзбекстан рекордын жаңалағаны және паражүзиў бойынша әндижанлы Ҳикматулла Ҳайдаралиев, қарақалпақстанлы Шаҳноза Ережепбаева 4 алтын медалды қолға киргизгенин мақтаныш пенен атап өтемиз.
Сырдәрялы жеңил атлетикашы қызымыз Дурдана Жуманқулова үш гүрес беллесиўлеринде 2014 үпай топлап, бул категориядағы беллесиўлерде 14 жасар спортшыларымыз арасында ең жоқары нәтийжеге ерискени де бәршемизди қуўандырды.
Бүгин елимиз майданларында тапланған бундай жеңимпаз ҳәм сыйлы перзентлеримиз келешекте континент ҳәм жәҳән бириншиликлеринде, Олимпия ҳәм Паралимпия ойынларында да Ўатанымыздың абырайын әлбетте мүнәсип қорғайды, деп исенемен.
Бул жарысларда жеңилгенлер болмады деп ойлайман. Жеңимпаз ҳәм сыйлы орын ийелери қатарында беллесиўлерде қатнасқан ҳәр бир спортшы өзи ушын зәрүр билим ҳәм тәжирийбе топлады. Соның ушын келешекте олар да әлбетте жеңимпазлар қатарында болады, деп айтыўға барлық тийкарларымыз бар.
Пурсаттан пайдаланып, перзентлеримиздиң үлкен спортта өз орнын табыўы ушын оларға ийинлес болып киятырған әзиз ата-аналарға, олардың ең жақын кеңесгөйи ҳәм тәрбияшысы болған жанкүйер устаз ҳәм тренерлерге шын кеўилден миннетдаршылық билдиремен.
Қәдирли жаслар!
Бәршемиздиң мақтанышымызға айланып атырған Олимпиадамызда сизлер ерискен нәтийжелер – дүнья майданларына қарай тасланған исенимли қәдем болып есапланады. Алдында сизлерди және де үлкен мийнет, ерк-ықрар ҳәм мәртликти талап ететуғын шеклер күтип тур.
"Өз" идеямызға әмел етип, ҳеш қашан өз күшлериңизге исенимиңизди жоғалтпаң, өзиңиз үстинде ислеўди тоқтатпаң!
Ҳақыйқый чемпионлар, ҳақыйқый палўанлар тек ғана жеңис пенен емес, ал қыйыншылықларды мәртлерше жеңип, мақсетке исенимли умтылыўы менен де өрнек ҳәм үлги көрсетеди.
Бәршеңизге беккем денсаўлық, таўсылмас күш-ғайрат ҳәм келеси жарысларда және де жоқары табыслар яр болсын, әзиз перзентлерим!
Шавкат Мирзиёев,
Өзбекстан Республикасы Президенти
