Елімізде экономика салалары үшін заманауи кәсіптер мен дағдыларды меңгерген мамандар даярлау, халықты еңбек нарығының сұранысына сай мамандықтарға оқыту жұмыспен қамтуды қамтамасыз етудің және тұрғындардың табысын арттырудың маңызды тетігі саналады.
Осыған байланысты кейінгі жылдары кәсіптік білім беру жүйесін реформалауға, оқу бағдарламаларын жұмыс берушілердің қажеттіліктеріне бейімдеуге және жеке сектордың қатысуын кеңейтуге ерекше көңіл бөлініп келеді.
Таныстырылым барысында кәсіптік білім беру қызметтерін көрсетудегі жеке сектордың мүмкіндіктерін кеңейтуге бағытталған жаңа бастамалар қаралды.
Атап өтілгендей, алдағы үш жылда халықаралық стандарттар негізінде құрылған оқу және бағалау орталықтарының санын қазіргі 50-ден 200-ге дейін жеткізу көзделіп отыр. Сондай-ақ жеке кәсіптік білім беру арқылы жыл сайын 500 мың адамды қамту жоспарланған. Қазіргі уақытта бұл көрсеткіш 45 мың адамды құрайды.
Ол үшін 300-ден астам оқу бағдарламасы қайта қаралып, халықаралық талаптарға сәйкестендіріледі. Кемінде мың оқытушы мен өндірістік оқыту шеберінің біліктілігі арттырылады. Бағдарламаларды қаржыландыру үшін Жұмыспен қамту қорынан 500 миллиард сум бөлінеді.
Таныстырылымда кәсіпкерлермен кездесулер барысында көтерілген ұсыныстар мен мәселелер де талқыланды. Атап айтқанда, жеке кәсіптік білім беру орталықтарына кедендік баж және әлеуметтік салық бойынша жеңілдіктер беру, жеңілдетілген несие ұсыну, кейбір шығындарды өтеу, жаңа ғимараттарға сыртқы инфрақұрылымды бюджет есебінен тарту және жер телімдерінің құнын пайызсыз бөліп төлеу мәселелері қарастырылды.
Осыған байланысты жеке кәсіптік білім беру ұйымдары үшін қажетті құрал-жабдықтар мен техникаларды кедендік баж салығынан босату, шетелдік оқытушылар мен мамандар үшін әлеуметтік салық мөлшерлемесін 1 пайыз деңгейінде белгілеу ұсынылды.
Сонымен қатар екі жылдық жеңілдік кезеңімен жеті жылға дейін жеңілдетілген несиелер беріледі. Ғимарат салу және жөндеу, сондай-ақ қажетті жабдықтарды сатып алу үшін алынған несиелер бойынша пайыздық шығындардың 7 пайызы өтеледі.
Шетелдік мамандар мен білікті оқытушыларды тартуға жұмсалған шығындардың 50 пайызы өтелмек. Кәсіби біліктілікті бағалау құралдары мен бағдарламалық өнімдер шығындарының 30 пайызы, ал халықаралық деңгейде танылатын және ұлттық кәсіби сертификаттарды алуға кеткен шығындардың 50 пайызы көлемінде өтемақы төленеді.
Сонымен бірге мұндай жеңілдіктерді пайдаланатын кәсіпкерлер салынған немесе жалға алынған ғимараттардың кемінде 60 пайызын кәсіптік даярлық пен тәжірибелік сабақтарға пайдалануы тиіс болады.
Кәсіпкерлерге сатып алынған жер телімдерінің құнын бес жылға дейін пайызсыз бөліп төлеу, бос тұрған мемлекеттік нысандарды кемінде бес жыл мерзімге жалға алу және техникумдардың пайдаланылмай тұрған ғимараттарын тегін пайдалану мүмкіндігі беріледі.
Жеке кәсіптік білім беру ұйымдарын дамыту мақсатында жыл соңына дейін оларды жабдықтау бағдарламасына 100 миллион доллар тарту жоспарланған. Сонымен қатар түлектердің жобаларын қолдау үшін 5 миллион долларлық «Венчурлық қор» құрылады. Биылдан бастап жыл сайын «Кәсіп ваучері» бағдарламасына 20 миллиард сум бөлінеді.
Таныстырылымда жеке кәсіптік білім беру ұйымдарының қауымдастығын құру, оның қызметін қаржыландыру және «Дағдылар паркі» экожүйесін қалыптастыру жоспарлары да қарастырылды. Сондай-ақ саладағы мәселелерді мемлекеттік органдармен бірлесіп жедел шешу үшін тұрақты жұмыс істейтін цифрлық диалог алаңын іске қосу қажеттігі атап өтілді.
Мемлекет басшысы ұсынылған шараларды мақұлдап, жеке кәсіптік білім беруді дамыту, оқу бағдарламаларын халықаралық стандарттарға сәйкестендіру, халықты сұранысқа ие мамандықтарға оқыту және кәсіпкерлер үшін жасалған мүмкіндіктерді тиімді пайдалану жөнінде жауапты тұлғаларға нақты тапсырмалар берді.
