Фарғона вилояти Ички ишлар бошқармаси Кибержиноятларга қарши кураш бошқармаси ходимлари томонидан ўтказилган тезкор тадбирда 2008 ва 2009 йилларда туғилган, Фарғона шаҳрида яшовчи бир нечта шахслар ушланган.

Аниқланишича, улар бошқа шахслар номига расмийлаштирилган «Ҳамкорбанк», «Капиталбанк», «Универсалбанк», «Ипотекабанк», «Инфинбанк» ва «Ипак Йўли» банкларининг пластик карталарини пул эвазига олиб, улардан фойдаланиб келган.

Ушланган шахслардан 4 та банк пластик картаси ва 2 та телефон ашёвий далил сифатида олинган.

Тезкор тадбир давомида Фарғона шаҳрининг Мирзо Улуғбек маҳалласида яшовчи, 2009 йилда туғилган шахснинг хонадони кўздан кечирилганда эса 152 та банк пластик картаси ва 28 та телефон аниқланган.

Тергов давомида мазкур гуруҳга 2009 йилда туғилган, шаҳарнинг Соҳибқирон Темур кўчасида яшовчи шахс раҳбарлик қилиб келгани аниқланган. Ундан ҳам 4 та банк картаси ва 2 та телефон олинган.

Тезкор тадбир материалларига кўра, гуруҳ ўз фаолияти давомида турли платформалардан фойдаланиб, электрон ҳамёнлар орқали 8 миллиард сўмга тенг операцияларни амалга оширган.

Ҳозирда барча гумон қилинувчилар ушланган. Ҳолат юзасидан Ўзбекистон Республикаси Жиноят кодексининг 278-моддаси 3-қисми билан жиноят иши қўзғатилиб, дастлабки тергов ҳаракатлари олиб борилмоқда.

Ҳуқуқни муҳофаза қилувчи органлар рақамли технологиялар ва криптоактивлар билан боғлиқ операцияларни қонунчилик талабларига мувофиқ амалга ошириш зарурлигини эслатмоқда.