Агентлик маълумотига кўра, 2000 йил 19 февралда туғилган Маҳмуд Ҳикматовга нисбатан суд томонидан қамоққа олиш тарзидаги эҳтиёт чораси қўлланган.

У «SultanGames», «PINCO», «Nomadcasino», «Pin-Up», «Vavada» ва бошқа ноқонуний интернет-казиноларни тарғиб қилишда гумонланмоқда.

Қайд этилишича, Қозоғистон ҳудудида ноқонуний интернет-казино интерфейсини тақдим этиш, пул маблағларини қабул қилиш ва тўлаш, шунингдек, мамлакат фуқароларини тақиқланган қимор фаолиятига жалб этиш мақсадида реклама тарқатиш билан боғлиқ тизим фаолият юритган.

Мазкур интернет-казиноларни тарғиб қилиш учун ташкилотчилар блогер М. Ҳикматовни жалб қилган. Унга Қозоғистон ҳудудида фаолият юритувчи инфлюенсерларни реклама контенти жойлаштиришга жалб қилиш вазифаси юклатилган.

Ҳикматов блогерлардан ижтимоий тармоқлардаги аудиторияси ҳақидаги статистик маълумотларни, жумладан, обуначиларнинг демографик ва географик кўрсаткичлари ҳамда аудитория қамрови ҳақидаги маълумотларни сўраган. Ушбу маълумотлар асосида реклама хизматлари нархи белгиланган.

Агентлик маълумотига кўра, Ҳикматов 35 нафардан ортиқ блогерни жалб қилган. Улар орасида блогер Қамза Қ. ҳам бўлган.

Тергов версиясига кўра, Қамза Қ. ўзининг кенг аудиториясидан фойдаланиб, Қозоғистон фуқароларини тақиқланган қимор фаолиятига жалб қилган. Хусусан, у интернет-казиноларга йўналтирувчи реферал ҳаволаларни жойлаштириб, фойдаланувчиларнинг ҳар бир ўтиши учун мукофот олган.

Эслатиб ўтамиз, Қамза Қ. 6 август куни Вьетнамдан Қозоғистонга экстрадиция қилинган.

Молиявий мониторинг агентлиги қидирувда бўлган шахснинг қаердалиги ҳақида маълумотга эга бўлганларни хабар беришга чақирди.