Маълум қилинишича, Юнусобод туманида жойлашган «Уч қаҳрамон» ЙПХ масканида пойтахтга кириб келаётган «Спарк» русумли автомобиль тўхтатилиб, текширилган. Натижада, йўловчи сифатида кетаётган, 2004 йилда Сурхондарё вилоятида туғилган шахсга тегишли селофан пакет ичидан 200 та зип-пакетга жойланган 365 грамм «Мефедрон» синтетик наркотик моддаси топилган.
Тезкор тадбир давомида ушбу шахс вақтинча истиқомат қилаётган Тошкент туманидаги хонадон ҳам кўздан кечирилган. У ердан 734 грамм «Мефедрон», 63 грамм «Альфа-PVP», 45 грамм «Спайс», иккита электрон тарози, зип-пакетлар ва бошқа ашёлар процессуал тартибда расмийлаштириб олинган.
Аниқланишича, муқаддам ўғрилик билан боғлиқ жинояти учун судланган шахс ҳозирда интернет-наркодўконда «закладчик» сифатида фаолият юритган.
Ҳолат юзасидан унга нисбатан жиноят иши қўзғатилиб, тергов ҳаракатлари олиб борилмоқда.
