Маълум қилинишича, 2003 йилда туғилган сариосиëлик фуқаро 2023 йилда мавсумий ишлаш мақсадида Россиянинг Доғистон Республикаси Маҳачқалъа шаҳрига борган. У ерда маҳалладоши, «Муҳаммад» лақабли тенгдоши билан яқин алоқа ўрнатиб, ижтимоий тармоқларда ақидапарастлик ғоялари сингдирилган видеоматериалларни кўриш орқали радикал ғоялар таъсирига тушган.

Кейинчалик улар яна бир маҳалладошини ўз сафига жалб қилиб, Сурияга боришни режалаштирган. Сафар харажатлари учун гуруҳ аъзоларидан бири Россияда меҳнат мигранти бўлиб ишлаётган оила аъзолари жамғарган маблағнинг бир қисмини рухсатсиз олган.

Учовлон Маҳачқалъа–Москва йўналишида автобусда йўлга чиқиб, кейин Москвадан Истанбул орқали Сурияга боришни режалаштирган. Бироқ Москвадаги келишмовчилик сабаб уларнинг икки нафари ортга қайтган. «Муҳаммад» эса Қозон шаҳрида қотиллик содир этиб, Россия қонунчилиги асосида жиноий жавобгарликка тортилган.

Гуруҳнинг 2005 йилда туғилган аъзоси Ўзбекистонга депортация қилингач, Жиноят кодексининг 244-1 ва 244-2-моддаларида назарда тутилган жиноятларни содир этганликда айбли деб топилиб, суд ҳукми билан 7 йилга озодликдан маҳрум қилинган.

Шунга қарамай, гуруҳ фаолияти давом этган. Маҳачқалъа шаҳрида ишлаётган 1999 ва 2001 йилларда туғилган яна икки нафар сариосиëлик фуқаро яширин гуруҳга қўшилиб, террорчилик ташкилотлари ғояларини тарғиб қилган ҳамда келгусида жангарилар сафида қўпорувчилик ҳаракатларини содир этишни режалаштирган.

2025 йил сентябрь ойида гуруҳ фаоллиги яна кучайган. Улар Маҳачқалъада ҳуқуқ-тартибот органлари ходимларига қарши жиноий ҳаракатлар содир этишга уринган. Бундан ташқари, Сариосиёда яшовчи 2004 йилда туғилган яна бир фуқаро ижтимоий тармоқлар орқали гуруҳ сафига жалб қилинган.

Давлат хавфсизлик хизмати ҳамда Россия ҳуқуқ-тартибот идоралари ҳамкорлигида ўтказилган тезкор-қидирув тадбирлари натижасида гуруҳ фаолиятига чек қўйилган. Тергов жараёнида уларнинг жиноий ҳаракатлари ўз исботини топган.

Жиноят ишлари бўйича Сариосиё туман суди ҳукми билан 4 нафар шахс Жиноят кодексининг 155-2, 244-1 ва 244-2-моддаларида назарда тутилган жиноятларни содир этганликда айбли деб топилди.

Суд ҳукмига кўра, уларнинг ҳар бири 8 йил 6 ой муддатга озодликдан маҳрум қилинди.