Тошкент халқаро аэропортида «Бангкок – Тошкент» йўналишида учиб келган фуқаронинг юклари рентген аппарати орқали текширилганда, шубҳали озиқ-овқат маҳсулотлари борлиги аниқланган.

Текширув давомида Тошкент вилоятининг Ўртачирчиқ туманида яшовчи, 2002 йилда туғилган, муқаддам судланган шахс турли озиқ-овқат маҳсулотлари ниқоби остида 978 грамм каннабис мойи ҳамда таркибида психофаол модда бўлган, тахминий оғирлиги 500 граммни ташкил этувчи қўзиқоринларни олиб келгани маълум бўлган. Ушбу маҳсулотларни кейинчалик сотиш мақсадида олиб киргани аниқланган.

Бошқа ҳолатда Тошкент тумани ҳудудида ҳаракатланаётган «Damas» автомашинаси тўхтатилиб, холислар иштирокида кўздан кечирилган. Автомашинада йўловчи сифатида кетаётган Фарғона вилоятининг Олтиариқ ва Учкўприк туманларида яшовчи, 1987 ва 1989 йилларда туғилган икки шахсга тегишли пакетлардан таркибида «Сибутрамин» кучли таъсир қилувчи моддаси бўлган 12 992 дона кофе маҳсулоти аниқланган.


Маълум бўлишича, улар қўшни республикадан олиб келинган мазкур маҳсулотларни Фарғона вилоятида сотишни режалаштирган.

Ҳар икки ҳолат бўйича жиноят ишлари қўзғатилиб, ҳозирда тергов ҳаракатлари олиб борилмоқда.