Унда гиёҳвандлик ва наркожиноятларга қарши курашиш, кибержиноятларнинг олдини олиш ҳамда аҳоли, айниқса, ёшлар хавфсизлигини таъминлашга алоҳида эътибор қаратилади.
Ички ишлар вазири Азиз Ташпулатов раислигида ўтказилган йиғилишда мазкур тадбирнинг янги босқичига тайёргарлик ва аввалги босқич натижалари муҳокама қилинди.
Олдинги босқичда жиноятлар 2 228 тага камайган
Жорий йилнинг 1 июль — 15 август кунлари ўтказилган тадбирнинг иккинчи босқичи натижасида олди олиниши лозим бўлган жиноятлар 2 228 тага камайган.
Қотиллик, оғир тан жароҳати етказиш, талончилик, босқинчилик, фирибгарлик ва безорилик каби жиноятлар сони пасайган. Ички ишлар органлари ходимларининг ташаббуси билан жиноятларни аниқлаш кўрсаткичи эса 792 тага ошган.
Қарийб 1,8 миллион доза гиёҳвандлик воситаси аниқланган
Тадбир давомида «қора бозор»даги тахминий қиймати 221,7 миллиард сўм бўлган 1,8 миллион доза гиёҳвандлик воситаси аниқланган.
Шунингдек, 66 минг дона кучли таъсир қилувчи дори воситалари ва 44 919 туп заҳриқотил ўсимлик мусодара қилинган. Учта ноқонуний нарколаборатория фаолиятига чек қўйилган.
Бу каби чоралар, айниқса, ёшларни гиёҳвандлик балосидан ҳимоя қилиш ва наркотик моддаларнинг ноқонуний тарқалишига қарши курашишга қаратилган.
Кибержиноятлардан 18 мингдан ортиқ фуқаронинг ҳуқуқлари тикланган
Интернет орқали содир этилаётган жиноятлар ҳам йиғилишда алоҳида муҳокама қилинди.
Маълум қилинишича, ўтган даврда Ўзбекистон кибермакониини ҳимоя қилиш мақсадида 24 мингдан ортиқ тезкор-техник ва тезкор-қидирув тадбирлари ўтказилган.
Натижада 17 490 та ахборот технологияларидан фойдаланган ҳолда содир этилган жиноят фош этилган. Бу ўтган йилнинг мос даврига нисбатан 251 фоизга кўп.
Кўрилган чоралар натижасида 18 мингдан ортиқ фуқаронинг бузилган ҳуқуқ ва қонуний манфаатлари тикланган. Уларга етказилган 182 миллиард 176 миллион сўм моддий зарарнинг қайтарилиши таъминланган.
660 мингдан ортиқ фуқаронинг пуллари талон-торож қилинишига йўл қўйилмаган
Кибержиноятчилар кўпинча фуқароларнинг банк карталари маълумотлари ва тасдиқлаш кодларини қўлга киритиш орқали пулларини ўзлаштиришга ҳаракат қилади.
Ички ишлар органлари томонидан банк ҳисобварақларидан маблағларни ноқонуний ечиб олишга қаратилган 459 та фишинг туридаги зарарли дастур аниқланиб, уларнинг фаолиятига чек қўйилган.
Бунинг натижасида сўнгги 9 ой давомида 660 мингдан ортиқ фуқаронинг электрон қурилмалари ва пул маблағлари талон-торож қилинишига йўл қўйилмаган.
Шунингдек, криптоактивлар айланмаси соҳасидаги қонунчилик бузилиши билан боғлиқ 3 929 та жиноят аниқланган. Жиноий йўл билан топилган 112,2 миллиард сўмдан ортиқ маблағларни криптоактивлар шаклида мамлакатдан олиб чиқиб кетишнинг олди олинган.
Фуқаролар нималарга эътибор бериши керак?
Ички ишлар органлари аҳолини интернетдаги фирибгарликлардан эҳтиёт бўлишга чақирмоқда.
Жумладан:
- Банк картаси маълумотлари ва SMS-кодларни бегона шахсларга бермаслик;
- Номаълум ҳаволалар орқали кирилган сайтларга шахсий маълумотларни киритмаслик;
- Интернет орқали келган шубҳали таклифларга ишонмаслик;
- Ижтимоий тармоқлардаги аккаунтлар ва шахсий маълумотларни ҳимоя қилиш.
«Хавфсиз ва соғлом юрт» тадбирининг учинчи босқичида ҳуқуқни муҳофаза қилувчи органлар, маҳаллий ҳокимликлар ва бошқа ташкилотлар ҳамкорлиги кучайтирилади.
Тадбир доирасида жиноятчиликнинг олдини олиш, гиёҳвандликка қарши курашиш ва аҳоли, айниқса, ёшлар ўртасида соғлом турмуш тарзини тарғиб қилиш бўйича ишлар олиб борилади.
