«NURA Electric» корхонаи бузургест, ки ба истеҳсоли таҷҳизоти электротехникии шиддати баланд ва паст дар асоси давраи пурраи технологӣ тахассус дорад. Фаъолияти он ба таъмини соҳаи энергетика бо маҳсулоти ватанӣ, коҳиш додани вобастагӣ аз воридот ва густариши ҳамкории истеҳсолӣ дар ин соҳа мусоидат мекунад.
Ба корхонае, ки дар масоҳати 20 гектар бунёд шудааст, 50 миллион доллар сармоягузорӣ гардидааст. Дар ин ҷо беш аз 1 ҳазор ҷойи корӣ таъсис ёфта, истеҳсоли зиёда аз 1,5 ҳазор номгӯйи маҳсулот ба роҳ монда шудааст. Аз ҷумла, таҷҳизоти тақсимкунандаи барқи шиддаташ 0,4–500 киловолт, зеристгоҳҳо, шкафҳои автоматикунонии манбаъҳои барқароршавандаи энергия, шинаҳои барқӣ ва конструксияҳои металлӣ истеҳсол мешаванд. Иқтидори солонаи корхона беш аз 25 ҳазор адад таҷҳизотро ташкил медиҳад.
Корхона бо технологияҳои муосир муҷаҳҳаз шудааст. Аз ҷумла, дар он дастгоҳҳои дастгоҳсозӣ ва прессҳои дорои идоракунии рақамии барномавии ширкати ҷопонии «Amada», инчунин таҷҳизоти баландтехнологии ширкатҳои туркии «Durma» ва «Teslabend» насб шудаанд. Шумораи умумии онҳо аз 120 адад зиёд аст.
Равандҳои истеҳсолӣ ва идоракунии корхона тавассути платформаи ягонаи рақамии SAP ERP ҳамоҳанг карда мешаванд. Ба шарофати беҳсозии равандҳо, инчунин маҳаллисозии истеҳсолот ва ҷузъу қисмҳои эҳтиётӣ, арзиши аслии маҳсулот то 10 фоиз коҳиш дода шудааст.
Дар маҷмаа озмоишгоҳи аккредитатсияшудаи санҷишӣ фаъолият мекунад. Маҳсулот мутобиқи талаботи стандартҳои байналмилалии ISO истеҳсол мешавад. Корхона имконият дорад, ки васлу насби пурраи таҷҳизотро анҷом дода, маҳсулотро дар озмоишгоҳи худ санҷад ва хизматрасонии техникии шабонарӯзиро пешниҳод намояд.
Бо мақсади омода кардани кадрҳои соҳибихтисоси муҳандисию техникӣ ҳамкорӣ бо ҷамъияти саҳомии «Ӯзэнергоинжиниринг» ва Донишгоҳи давлатии техникии Тошканд ба роҳ монда шудааст. Ҳамасола беш аз 100 нафар донишҷӯи донишгоҳ дар корхона таҷрибаомӯзии истеҳсолии музднок мегузаранд.
Сарвари давлат аз намоишгоҳи маҳсулоти тайёри корхона боздид намуда, бо зеристгоҳҳои трансформаторӣ, таҷҳизоти тақсимкунандаи барқ ва дигар таҷҳизоти энергетикӣ, ки бо истифода аз ашёи хоми маҳаллӣ ва технологияҳои муосир истеҳсол шудаанд, шинос гардид.
Дар ин ҷо муаррифиномаҳо оид ба фаъолияти корхона, иқтидорҳои истеҳсолӣ ва нақшаҳои рушди минбаъдаи он пешниҳод шуданд. Зимни суҳбат бо кормандони корхона Сарвари давлат ба шароити меҳнати онҳо таваҷҷуҳ зоҳир карда, андешаву пешниҳодҳояшонро шунид.
Президент иқтидори истеҳсолии корхона ва сифати маҳсулоти онро баланд арзёбӣ намуда, ҷиҳати зиёд кардани ҳаҷми таҳвил ба бозори дохилӣ, афзоиши содирот ба кишварҳои Осиёи Марказӣ ва дигар бозорҳои хориҷӣ, инчунин ҷалби мутахассисони баландихтисоси ватанӣ ба соҳа тавсияҳо дод.
– Мо бояд на танҳо маҳсулот, балки хидматрасониҳои инжинирингиро низ содир кунем. Барои ин зарур аст, ки аз имкониятҳои ташкилотҳои лоиҳакашӣ ва озмоишгоҳҳои санҷишии дар кишварамон таъсисёбанда васеътар истифода барем, – таъкид кард Сарвари давлат.
Зарурати зиёд кардани номгӯй ва ҳаҷми истеҳсоли қисмҳои эҳтиётӣ ва ҷузъу лавозимот, инчунин васеъ намудани доираи хизматрасониҳои техникӣ таъкид гардид.
Ҳамчунин, ба баланд бардоштани сатҳи маҳаллисозӣ дар лоиҳаҳои соҳаи энергетика таваҷҷуҳи махсус зоҳир карда шуд. Аз ҷумла, вазифа гузошта шуд, ки ҳиссаи институтҳои лоиҳакашии ватанӣ дар таҳияи лоиҳаҳо ба ҳадди ақал 50 фоиз расонда шавад.
– Мо бояд ба лоиҳакашони ватанӣ бовар кунем ва барои фаъолияти онҳо шароити зарурӣ фароҳам оварем. Дар кишварамон мутахассисони ҷавоне ҳастанд, ки дар хориҷи кишвар таҳсил карда, таҷриба андӯхтаанд. Агар дар атрофи онҳо кадрҳои касбиро муттаҳид намуда, бо фармоишҳо таъмин кунем, метавонем ин соҳаро рушд диҳем, – таъкид кард Президент.
Бо ин мақсад, дар минтақаҳои кишвар таъсиси филиалҳои институтҳои лоиҳакашии ба соҳаи энергетика тахассусёфта пешбинӣ гардид.
