Дар доираи ин иқдом аз маҳаллаҳо, кӯчаҳо ва ҷойҳои ҷамъиятӣ партовҳо бароварда шуда, партовгоҳҳои ғайриқонунӣ барҳам дода ва минтақаҳои сабз ба тартиб дароварда мешаванд.
Тибқи фармони Президент, аз 1 октябр ба тоза кардани на танҳо кӯчаҳо ва маҳаллаҳо, балки роҳҳо, ҷӯйборҳо, каналҳо, обанборҳо ва дигар ҷойҳои ҷамъиятӣ низ таваҷҷуҳи махсус зоҳир карда мешавад.
Барои сари вақт баровардани партовҳо дар минтақаҳо техникаи махсус ҷалб карда шудааст. Ҳамзамон, корҳои беҳсозии вазъи санитарии ҳудудҳо, кабудизоркунӣ ва баланд бардоштани фарҳанги экологии аҳолӣ ба роҳ монда шудаанд.
Дар баъзе минтақаҳо аллакай корҳои назаррас анҷом дода шудаанд:
— Дар Ҷумҳурии Қароқалпоқистон беш аз 229 адад техника ҷалб гардида, аз 139 маҳалла партовҳо бароварда шудаанд. Дар маҷмӯъ 9090 тонна партов ҷамъоварӣ ва интиқол дода шудааст.
— Дар вилояти Андиҷон беш аз 330 адад техника ба кор ҷалб гардида, аз зиёда аз 230 маҳалла 23 671 тонна партов бароварда шудааст.
— Дар вилояти Самарқанд бо иштироки беш аз 440 адад техника 319 маҳалла тоза карда шуда, аз онҳо 23 125 тонна партов бароварда шудааст.
— Дар шаҳри Тошканд 261 адад техника ҷалб гардида, дар 228 маҳалла 47 942 тонна партов ҷамъоварӣ ва интиқол дода шудааст.
Дар доираи амалиёти думоҳа ба кабудизоркунӣ низ таваҷҷуҳи алоҳида дода мешавад. Барои шинонидани ниҳолҳо ҳудудҳо муайян гардида, дар доираи марҳилаи тирамоҳии лоиҳаи умумимиллии «Яшил макон» қитъаҳои замин омода карда мешаванд.
Аз ҷумла, дар вилояти Намангон барои мавсими тирамоҳӣ 10 миллиону 597 ҳазор ниҳолу бутта захира карда шудааст. Дар минтақаҳои сабз низоми обёрӣ бо дарозии умумии 191 ҳазору 500 метр фаъолият дорад.
Корҳои омодагӣ дар вилояти Бухоро низ идома доранд. Дар ҳудудҳои маҳаллаи Паноби ноҳияи Вобкент ва ноҳияи Ҷондор қитъаҳои замин барои шинонидани ниҳолҳо омода карда мешаванд. Дар ноҳияи Ҷондор инчунин фаъолияти ниҳолхона омӯхта шуда, барои обёрии ниҳолҳо чоҳ канда, корҳои мулчакунӣ ва компосткунӣ анҷом дода шудаанд.
Чорабиниҳои марбут ба амалиёти думоҳаи «Тозагӣ ва озодагӣ» оид ба тозакунӣ, ободонӣ ва кабудизоркунии ҳудудҳо дар саросари кишвар идома доранд.
