Nizomga ko‘ra, fuqaro ro‘yxatdan o‘tgan hududidan qat’i nazar, mamlakatning istalgan hududidagi birlamchi uy-joy bozoridan ipoteka krediti asosida xonadon sotib olishi mumkin.

Subsidiya olish uchun ariza Davlat xizmatlari markazlari yoki Yagona interaktiv davlat xizmatlari portali (my.gov.uz) orqali topshiriladi.

Ariza beruvchilarni baholashda ularning amalda davlat tibbiyot muassasasida ishlayotgani hamda shu tizimda kamida 15 yillik ish stajiga ega ekani tasdiqlanishi lozim.

Qarorga muvofiq, subsidiya bir oilaga (er yoki xotindan biriga) faqat bir marta ajratiladi.

Tanlov to‘liq onlayn tarzda o‘tkaziladi. Belgilangan mezonlarga to‘liq javob bergan nomzodlar orasidan har chorakda ajratilgan kvota doirasida 125 nafar g‘olib avtomatik tasodifiy tanlash tizimi — random.org orqali aniqlanadi.

Subsidiya ajratilgani haqida xabarnoma olgan g‘olib uy-joyni ipoteka krediti asosida xarid qilish uchun qurilish (pudrat) tashkiloti bilan birlamchi shartnoma tuzadi.