Tabrikni Oʻzbekiston Respublikasi Prezidenti Administratsiyasining Kommunikatsiyalar departamenti boshligʻi – Prezident matbuot kotibi Sherzod Asadov oʻqib eshittirdi.
Davlat rahbari oʻz tabrigida ushbu anjumanni tashkil etishda hamkorlik qilayotgan Birlashgan Millatlar Tashkiloti va uning Bolalar jamgʻarmasi – YUNISEF, Jahon banki, Jahon sogʻliqni saqlash tashkiloti, Xalqaro ijtimoiy taʼminot uyushmasi hamda barcha hamkorlarga minnatdorlik bildirdi.
Nutqda keng qamrovli islohotlar natijasida mamlakatimizda tugʻruq jarayonida onalar oʻlimi, bolalarning oʻsishdan ortda qolishi ikki barobar qisqargani, maktabgacha taʼlim qamrovi 27,7 foizdan 78 foizga oshirilgani, olti yoshli bolalarning qariyb 100 foizi maktabga tayyorlovga jalb etilgani hamda oliy taʼlim bilan qamrov 5 barobar – 9 foizdan 45 foizga oshgani alohida qayd etildi.
Yuzdan ortiq mamlakat vakillari ishtirok etayotgan Anjuman doirasida bolalar salomatligi, ijtimoiy himoya, taʼlim, xavfsizlik va oilalarni qoʻllab-quvvatlash masalalari oʻzaro bogʻliq yoʻnalishlar sifatida muhokama qilinmoqda.
Sammit Oʻzbekiston tashabbusi bilan BMT Bosh kotibining bolalarga nisbatan zoʻravonlik masalalari boʻyicha Maxsus vakili, YUNISEF, Jahon sogʻliqni saqlash tashkiloti va Jahon banki hamkorligida tashkil etilmoqda. Dasturda ochilish yalpi majlisi, uchta mavzuli panel sessiya, bolalar saratoni boʻyicha ikkinchi xalqaro kongress, yondosh tadbirlar hamda muassasalar faoliyati bilan tanishish nazarda tutilgan. Samarqand deklaratsiyasining qabul qilinishi kutilmoqda; uning yakuniy maqomi sammit natijalariga koʻra maʼlum boʻladi.
Sammitning markaziy mavzusi — bola hayotidagi oʻzgarishlarni alohida nafaqa yoki xizmat natijasi sifatida emas, sogʻliqni saqlash, taʼlim, ijtimoiy himoya va oilaviy muhitning birgalikdagi taʼsiri orqali baholash. Oʻzbekistonda ijtimoiy xizmatlar turi 26 tadan 140 taga yetgan, bolalar kambagʻalligi 21,5 foizdan 5,4 foizga kamaygan, maktabgacha taʼlim qamrovi 27,7 foizdan 78 foizga oshgan. Mazkur koʻrsatkichlar sammitga taqdim etilayotgan milliy islohotlar natijalari sifatida keltirilmoqda.
Sammit doirasida tashkil etilayotgan koʻrgazma Oʻzbekistonda har bir bolaning salomatligini muhofaza qilish, huquqlarini himoya qilish va salohiyatini yuzaga chiqarishga qaratilgan oʻzgarishlarga bagʻishlangan. Unda sogʻliqni saqlash, ijtimoiy himoya va taʼlim sohalaridagi islohotlarning oʻzaro bogʻliqligi hamda bu islohotlarning bolalar va oilalar kundalik hayotidagi ahamiyati yoritiladi.
Koʻrgazmaning konseptual asosi — dunyo bola nigohida. Koʻrgazma yoʻnalishi kattalarga davlat islohotlari ortida bolaning hayotiy tajribasini — oʻzini xavfsiz his etishi, oilasi bagʻrida boʻlishi, taʼlim olishi, muloqot qilishi va oʻz kelajagini tanlash imkoniyatlarini koʻrishga yordam beradi. Bola farovonligi davlat va jamiyatning uzluksiz masʼuliyati sifatida namoyon boʻladi — bu boʻlajak onaga gʻamxoʻrlik qilish va xavfsiz tugʻruqdan tortib, taʼlim olish, kasb tanlash va mustaqil hayotgacha boʻlgan bosqichlarni qamrab oladi. Nogironligi boʻlgan, uzoq muddat davolanayotgan, ota-ona qaramogʻidan mahrum boʻlgan yoki ogʻir hayotiy vaziyatga tushib qolgan bolalarga alohida eʼtibor qaratiladi.
Koʻrgazmaning maqsadi — bolalarga kiritilgan investitsiyalar qanday qilib oilada yashash, sogʻliqni asrash, taʼlim olish, himoyada boʻlish va jamiyat hayotida ishtirok etish imkoniyatlariga aylanishini yoritib berish.
Sammitning rasmiy ochilish marosimi va panel sessiyalaridan tashqari, ishtirokchilar Oʻzbekistondagi ijtimoiy soha obyektlariga ham tashrif buyuradi.
Rashid Xoʻjamov
Yuz.uz muxbiri, Samarqand
