Maʼlum boʻlishicha, tadbirkorlar ushbu masalada amaliy yordam soʻrab Oʻzbekiston Respublikasi Prezidenti huzuridagi Biznes-ombudsmanga murojaat qilgan.

Oʻrganishlar davomida “Hududiy elektr tarmoqlari” AJ Toshkent shahar filiali tomonidan texnik shartlar qonun hujjatlari talablariga zid ravishda berilgani aniqlangan. Shu sababli tadbirkorlarning loyiha hujjatlarini kelishish vakolatiga ega organ tomonidan rad etilgan.

Amaldagi qoidalarga koʻra, soʻralayotgan quvvatga qarab texnik shartlar “Hududiy elektr tarmoqlari” AJ yoki uning hududiy filiallari tomonidan Davlat xizmatlari markazlari yoki Yagona interaktiv davlat xizmatlari portali orqali berilishi kerak.

Shuningdek, “Elektr energiyasidan foydalanish” qoidalarida “Hududiy elektr tarmoqlari” AJ isteʼmolchilarning elektr tarmoqlari va qurilmalarini oʻz hududiy elektr tarmoqlariga ulash boʻyicha texnik shartlar berishi belgilangan.

Aniqlangan qonunbuzilish holatlari yuzasidan “Hududiy elektr tarmoqlari” AJ Toshkent shahar filiali rahbariyatiga rasmiy taqdimnoma kiritildi.

Natijada 40 ga yaqin tadbirkorlik subyektining texnik shart olish va loyiha hujjatlarini kelishish bilan bogʻliq murojaatlari ijobiy hal etildi.