“Yangi Oʻzbekiston” gazetasida “Yangilanishlar xaritasi” loyihasini boshlagan edik. Unda mamlakatimizdagi islohotlarning hududlarda qay yoʻsin amalga oshayotgani, oddiy odamlar hayotidagi yangilanishlar, olis qishloq va ovullarda yashaydigan yurtdoshlarimiz oʻy-fikrlari, orzulari kabi masalalarga javob topish uchun gazetamizning Qoraqalpogʻiston Respublikasi va viloyatlardagi muxbirlari bilan onlayn gurung tashkil etib borishni maqsad qilganmiz.

Bu safargi suhbatimiz “Yangi Oʻzbekiston” massivlari haqida boʻldi. Unda yangi massivlar oddiy insonlar turmush ­tarzida qanday oʻzgarish yasaganini ochib berishga urindik. Suhbat chogʻida mavzuning koʻlami kengligi, bu borada aytiladigan fikrlar koʻpligini sezdik. Shu bois, eng muhim deb hisoblangan faktlar asosidagi fikrlarga koʻproq eʼtibor berdik. Umid qilamizki, poytaxtdan olisda, oddiy odamlar orasida yurgan jurnalistlar nigohi ila mamlakat boʻylab quloch yozgan yangilanishlar xaritasini koʻrish, tasavvur etish yoʻlidagi navbatdagi suhbatimiz siz, aziz oʻquvchilarga manzur boʻladi.

Tahririyat

Gʻolib ABDUSALOMOV:

— Mamlakatimiz hayotida soʻnggi 10 yil ulkan bunyodkorlik davri sifatida tarixga muhrlanyapti. Ushbu yangilanishlar shiddati olisu yaqin manzillarda birdek koʻzga tashlanmoqda. Xususan, Navoiy viloyatida ham oʻtgan qisqa davrda shaharu qishloqlar, chekka ovul va qoʻrgʻonlarda katta hajmdagi qurilish, bunyodkorlik ishlari bajarildi. Mahallalar obod boʻldi.

“Yangi Oʻzbekiston” massivlarini barpo etish dasturi ana shu bunyodkorlik ishlariga yangicha ruh berdi. Shunchaki ruh berdi deyish kamlik qiladi. Dastur xalqimizning uy-joyga ehtiyoji qatori yana bir qancha ijtimoiy-iqtisodiy masalalarga yechim boʻldi. Taraqqiyot shiddatini oʻzida jamlagan yirik loyiha sifatida hayotimizga kirib keldi.

Shu oʻrinda bir jihatni esga olsak. Dastlab qishloq joylarda, ochiq dalalarda koʻp qavatli uylar qurila boshlaganida ayrim yurtdoshlarimiz bunga bir oz ajablanish bilan qaragan edi. Shuncha keng joyda koʻp qavatli uylar qurish nimaga kerak degan savollar quloqqa chalingani bor gap. Negaki koʻp qavatli uyni qishda isitish, yozda salqin saqlash bilan bogʻliq masalalar koʻpchilikni oʻylantirardi. Shu paytgacha ayrim shaharchalarda ham oqova suv tizimi yoʻqligi bunga sabab edi.

“Yangi Oʻzbekiston” massivlari qarashlarimizni butkul oʻzgartirdi. Chekka, qarovsiz yotgan yerlardan ham oqilona foydalanish, zamonaviy shahar bunyod etish mumkinligini isbotladi. Xususan, Navoiy viloyati markazidan qariyb 200 kilometr uzoqdagi Zarafshon shahrida katta bunyodkorlik va obodonlashtirish ishlari bajarildi. Yoʻllar ravon boʻlib, chiroqlar oʻrnatildi. Yoʻl chetlariga manzarali gul va daraxt koʻchatlari ekildi. Zarafshon shahri tashkil etilganida 50 ming aholi yashashi moʻljallangan. Soʻnggi 20 yilda shaharda aholi soni qariyb 2 baravar koʻpaydi. Oʻz-oʻzidan uylar va infratuzilma obyektlari quvvati oshishi talabga aylandi. Sodda aytganda, bitta xonadonda bir necha oila tiqilib yashardi. Poliklinikaga borgan kishi uzoq navbatda turishga, qoniqarli boʻlmagan sharoitda davolanishga majbur edi. Negaki talab oshgani sari moddiy-texnik baza sabab xizmat sifatiga taʼsir qiladigan omillar koʻpayib borayotgandi.

Mamlakatimiz yetakchisining Navoiy viloyatiga tashrifi chogʻida hudud faollarining Zarafshon shahrini kengaytirish va shahar markaziy poliklinikasi uchun yangi bino qurish taklifi maʼqullandi. Oʻtgan qisqa muddat ichida shaharda 7-12 qavatli turar joy binolari qad rostladi. Hozir sanoatchilar shahri kun sayin kengayib bormoqda. Shahardagi “Yangi Oʻzbekiston” massivida 2024-yilda 100 ga yaqin koʻp qavatli turar joy qurilgan edi. Ular 2025-yilda 180 taga yetkazildi. Joriy yilda ham qurilish davom etyapti.

Yana bir misol. Karmana tumanining Doʻstlik mahallasida 21 gektarda “Yangi Oʻzbekiston” massivi barpo etildi. Uning birinchi bosqichi — 2022-2024-yillarda 420 xonadonli 18 ta koʻp qavatli uy qad rostladi. Oʻtgan 2025-yilda 40 xonadonli yana 2 ta uy foydalanishga topshirildi. Yurtdoshlarimizda ushbu massivlardan xonadon sotib olishga ishtiyoq baland. Negaki ular boshqa uylardan tubdan farq qiladi. “Yangi Oʻzbekiston” massivlarini shahar ichidagi alohida kichik shaharcha desak, toʻgʻri boʻladi. Yaʼni aholiga yashashi uchun nima kerak boʻlsa, qanday xizmatga zarurat boʻlsa, massivlarning oʻzida yaratilyapti. Bu xususda hamkasblarimiz ham fikrini batafsil aytadi. Demoqchimizki, “Yangi Oʻzbekiston” massivi timsolida insonga eʼtibor, uni qadrlashning amaliy ifodasini koʻrish mumkin.

Ushbu massivlarning oʻziga xosligi loyihada koʻp qavatli uylar yoniga maktab, bogʻcha, poliklinika, savdo nuqtalari kompleks tartibda qurilganida. Shunga asosan, tumandagi yangi massivda ham maktabgacha taʼlim tashkiloti, maktab va poliklinika qurilib, foydalanishga topshirildi.

— Bosh rejaga koʻra, tumanimizdagi “Yangi Oʻzbekiston” massivida 1180 xonadonli 56 ta koʻp qavatli uy qurish reja qilingan, — deydi Karmana tumani hokimi oʻrinbosari Anvar Toshnazarov. — Shuningdek, 1 ta 330 oʻrinli, 1 ta 660 oʻrinli umumiy oʻrta taʼlim maktabi, 180 oʻrinli 2 ta maktabgacha taʼlim tashkiloti, mahalla binosi, madaniyat uyi, savdo va maishiy xizmat koʻrsatish majmuasi, avtomobillar uchun turargoh, bolalar va sport maydonchalari, istirohat bogʻi, umumiy ovqatlanish hamda boshqa koʻngil­ochar shoxobchalar qurilishi koʻzda tutilgan. Yangi massivda binolar ­belgilangan standartlar asosida, shaharsozlik normalariga amal qilingan holda mustahkam va sifatli qilib qurilishi tegishli tashkilotlar nazoratiga olingan. 2022-2025-yillar davomida qurilishi yakunlangan koʻp qavatli uylar va binolar isitish tizimiga ulangan, gaz, suv, elektr bilan taʼminlangan va yangi xonadonlar aholiga zamonaviy dizaynda, toʻla-toʻkis taʼmirlangan holatda topshirildi.

Qiziltepa tumanining Malikobod mahallasida ham “Yangi Oʻzbekiston” massivi bun­yod etilyapti. Unda 52 ta koʻp qavatli uy, maktab, bogʻcha, oilaviy poliklinika, savdo va maishiy xizmat koʻrsatish obyektlari, istirohat bogʻlari boʻladi. Ichimlik suv, elektr, tabiiy gaz, issiqlik va kanalizatsiya tarmoqlari tortilib, ichki yoʻllar taʼmirlanyapti.

Qiziltepa tumani hokimi oʻrinbosari Hasan Aliyevning maʼlum qilishicha, massiv uchun 20,1 gektar yer ajratilgan. Loyihaning 1-bosqichida 200 xonadonli 8 ta 5 qavatli uy qurilib, foydalanishga topshirilgan. Shuningdek, 180 oʻrinli umumiy oʻrta taʼlim maktabi, 50 qatnovli tibbiyot muassasasi qurildi. Bu ishlar qisqa vaqt — 2022-2024-yillar davomida bajarildi. Ayni vaqtda 2-bosqich ishlari davom etmoqda. Uning doirasida 252 ta xonadonli 7 ta 9 qavatli uy qad rostlayapti. Bosh rejaga koʻra, 1112 xonadonli 50 ta koʻp qavatli uy, maktablar, mahalla binosi, madaniyat uyi, savdo va maishiy xizmat koʻrsatish majmuasi, avtoturargoh, bolalar va sport maydonchasi quriladi. 

“Yangi Oʻzbekiston” massivlari olis hududlarga ilgari shaharlarimizda ham boʻlmagan zamonaviy hayot tarzini olib kirdi. Shaxsan men shu paytgacha Toshkentda yoki dunyoning boshqa shaharlarida ham barcha imkoniyat, xizmatlar bir joyda jamlangan ixcham, zamonaviy, barcha talablarga javob beradigan shaharcha bunyod etilganini eshitmaganman. Toʻgʻri, bu borada izlanib muayyan oʻxshashliklarni topdim. Masalan, Singapur kabi rivojlangan davlatlarda shunga yaqin loyihalar bor. Ularda xizmat koʻrsatish tizimi bir joyda, yopiq bino ichida joylashgan. Massiv ichida ish oʻrinlari yaratilgan binolar esa faqat yotoqxona shaklida qurilgan.

“Yangi Oʻzbekiston” massivlari tom maʼnodagi shaharcha. Uning ish oʻrni ham, xizmat koʻrsatish sohasi ham, madaniy hordiq chiqarishga sayilgoh va choyxonalari ham bor. Xavfsizlik tizimi, aholini qiynaydigan savollarga javob shu mahallaning oʻzida jamlangan.

Akbar RAHMONOV:

— Toʻgʻri aytdingiz, Gʻolib aka! Bugun olis hududlar obod maskanga aylanyapti. Uch-toʻrt oy oldin borgan manzilga yana yoʻlingiz tushsa, oʻzgarishlardan hayratlanasiz. Uzoq yillar qarovsiz yotgan joylar qisqa fursatda goʻzal maskan boʻlib boryapti.

Ushbu yirik loyiha aniq huquqiy asos, iqtisodiy yechimlar bilan amalga oshirilmoqda. Xususan, 2021-yil 9-dekabrda davlatimiz rahbari “Yangi Oʻzbekiston” massivlarini qurish va hududlarning ijtimoiy-iqtisodiy rivojlanishini taʼminlash chora-tadbirlari toʻgʻrisida”gi farmonni imzolagan edi. Mazkur hujjatga koʻra, 2022-yildan manzilli roʻyxat asosida joylarda “Yangi Oʻzbekiston” massivlari qurilishi boshlandi.

Qashqadaryoda dastlab Koson va Yakkabogʻ tumanlarida zamonaviy uylar qurilishiga kirishilgan edi. Belgilangan muddatda sifatli, talab darajasida barpo etilgan imoratlar bugun aholiga xizmat koʻrsatmoqda.

Yakkabogʻ tumani hokimligi bergan maʼlumotga koʻra, “Yangi Oʻzbekiston” massivi uchun ajratilgan 18 gektar yerda jami 1340 xonadonli 54 ta 5 qavatli uy qurilib, foydalanishga topshirilgan. Loyiha doirasida 36 xonadonli 15 ta, 40 xonadonli 1 ta, 20 xonadonli 38 ta uy-joy barpo etilgan. Shuningdek, byudjet mablagʻlari evaziga 15 milliard soʻmga 330 oʻrinli 1 ta yangi maktab hamda 6,5 milliard soʻmga 120 oʻrinli 1 ta maktabgacha taʼlim tashkiloti va 1,7 milliard soʻmga mahalla binosi qurilgan.

Bu bitta hududdagi zarur inshootlar uchun sarflangan mablagʻ. Endi quyidagi faktlarga eʼtibor qiling. Ikki yoʻlakli koʻp qavatli oʻn beshta uyning 1-qavatidan tadbirkorlar uchun 3750 kvadrat metr joy ajratilgan. Ularda tadbirkorlarning 43 milliard soʻm mablagʻi hisobidan 45 dan ortiq yangi tadbirkorlik subyekti tashkil etilgan. Natijada 120 ta yangi ish oʻrni yaratilgan.

Biz bunday raqamlarni osongina aytib ketaveramiz. Ammo ularning har biri ortida juda katta mehnat, ishonch, ragʻbat va intilish bor. Masalan, hozir dunyoda geosiyosiy va geoiqtisodiy jarayon juda murakkab. Bunday vaziyatda har bir mamlakat ichki imkoniyatidan kelib chiqib, iqtisodiy barqarorlikni  saqlash choralarini koʻradi. Demoqchimizki, bitta massiv uchun mana shunday yirik miqdorda sarmoya ajratish oson emas.

Tadbirkorlar yangi binolarning birinchi qavatiga milliardlab pulini sarmoya qilishi ham bejiz emas. Chunki shu mablagʻ ortigʻi bilan qaytib kelishiga ishonadi. Negaki uylar xaridorgir. Xalqimiz uylarni toʻldirib yashay boshlashi hamon tadbirkorlar daromadi koʻpayaveradi. Bir tomonda esa ishbilarmonlarga katta imtiyoz va imkoniyatlar berilmoqda. Bu ularni ishini yanada kengaytirish, yangi ish oʻrinlari yaratishga ragʻbatlantirmoqda.

“Yangi Oʻzbekiston” massivlaridagi uylar nega xaridorgir? Sabab oddiy, u yerda barcha sharoit bor! Masalan, Yakkabogʻ tumanidagi massivda 3,1 kilometr ichimlik suv tarmogʻi uchun 2 ta suv inshooti hamda 8,4 kilometr oqova suv tarmogʻi uchun 1 ta inshoot va 6 kilometr ichki yoʻl qurilgan. Tagʻin 3,8 kilometr issiqlik tarmogʻi tortilib, qozonxona barpo etilgan. Tabiiy gaz uchun 1,5 kilometr quvur tortilib, 6 ta taqsimlash punkti, 50 kVt quyosh panellari va 140 ming litr sigʻimga ega 700 dona geliokollektor oʻrnatildi. Bunday ishlarni yana uzoq sanash mumkin.

Mana shu raqamlarning oʻzini bir joyda jamlab qarasangiz, ulkan bunyodkorlikni his etasiz. Zamonaviy shahar koʻrinishiga kelgan bu manzil bir paytlar qarovsiz maydon boʻlganiga ishonmaysiz. Yana bir gap. Mazkur massivda boshqa tuman va shaharlardagidan farqli oʻlaroq, yetakchi tadbirkor tashabbusi bilan yirik loyiha asosida ekobozor tashkil etilgan. Qiymati 6 million dollardan ortiq boʻlgan ushbu majmua uch qavatdan iborat boʻlib, 80 ta ish oʻrni yaratilgan. Muhimi, bozorda oziq-ovqat mahsulotlari ham, ­kiyim-kechaklar ham, dam olish va ovqatlanish nuqtalari ham bor.

Sarvar TOʻRAYEV:

— Surxondaryo viloyatining Angor, Boysun, Jarqoʻrgʻon, Sariosiyo va Termiz tumanlarida “Yangi Oʻzbekiston” massivlari ­bunyod etilgan. Ushbu uylardagi yangi xonadon ­kalitini qabul qilib olayotgan har bir yurtdoshimiz inson qadrini ulugʻlash yoʻlidagi islohotlardan mamnun.

Yuqorida hamkasblarimiz toʻgʻri aytdi: massivlardagi kenglik, muhtashamlik, obodlik va saranjom-sarishtalikdan dilingiz yayraydi. Har bir bino-inshootda xalqimizga xos yaratuvchanlik va bunyodkorlik salohiyati toʻliq namoyon boʻlayotgandek goʻyo. Sariosiyo, Boysun, Jarqoʻrgʻon, Angor va Termiz ­tumanlaridagi “Yangi Oʻzbekiston” massivlarida qad rostlayotgan 5 va 9 qavatli uylar ikki va uch xonadan iborat, zamonaviy hamda shinam. Bu binolar 9 balli zilzilaga chidamli qilib qurilgan.

Har bir xonadonda alohida issiqlik va suv isitish tizimi oʻrnatilgan. Bu xona haroratini mustaqil boshqarish, energiya sarfini 2 barobargacha qisqartirish imkonini beradi. “Yangi Oʻzbekiston” massivlarini bunyod etish borasidagi qaror va farmonlar qogʻozdagina emas, balki hayotda, kundalik turmush tarzida aksini topayotgani insonlarda ertangi kunga ishonchni, yurtga muhabbat va islohotlarga ishtiyoqni yanada mustahkamlayapti. Massivlardagi xonadonlarda yaratilgan har bir qulaylik, har bir innovatsion yondashuv xalqning yashash sifati oshishiga, oilaviy osoyishtalik va ijtimoiy barqarorlikka xizmat qilmoqda.

“Yangi Oʻzbekiston” massivi va uning atrofidagi obyektlar rejasini tuzishda istiqbolda aholi oʻsishi, hudud infratuzilmasi va ishlab chiqarish kengayishi kabi jihatlar ham nazarda tutilgan. Bu juda muhim omil. Shu bilan birga, massivlarga yondosh hududlarda foydalanishdan chiqqan yer maydonlarini qayta oʻzlashtirish hisobiga issiqxonalar qurish, savdo va xizmat koʻrsatish nuqtalari bunyod etish orqali yangi ish oʻrinlari yaratilmoqda.

Xususan, Jarqoʻrgʻondagi “Yangi Oʻzbekiston” massivida hozirga qadar 7 ta mikromarkaz, 29 ta savdo va maishiy xizmat koʻrsatish shoxobchasi qurilib, foydalanishga topshirildi. Bundan tashqari, massiv hududida 50 qatnovli oilaviy poliklinika, 180 oʻrinli bolalar bogʻchasi, 330 oʻringa ega maktab va AT markaz qurilgan. Infratuzilma obyektlarini qurish va obodonlashtirish shu bilan yakun topgani yoʻq. Massivga 1,9 kilometr ichimlik suv, 3,9 kilometr oqova suv, 2,3 kilometr issiqlik tarmoqlari, 2,8 kilometr gaz quvuri tortildi. 5 ta transformator oʻrnatildi. Piyodalar yoʻlakchalari qurilib, 4,5 gektar yerga manzarali va mevali daraxtlar hamda 300 gektar dasht hududiga saksovul ekildi.

Jarqoʻrgʻon tumanida qurilishi 2022-yilda boshlangan “Yangi Oʻzbekiston” massivida shu yil oxiriga qadar jami 86 ta koʻp qavatli uy foydalanishga topshirilishi belgilangan.

Surxon vohasining tabiiy-iqlim sharoitidan kelib chiqib, joylarda bunyod etilayotgan massivlarda yashil belbogʻlar, bogʻ yaratish, uylar atrofida turli mevali va manzarali daraxt koʻchatlari ekish, ularni sugʻorish tizimiga alohida eʼtibor ­berilyapti. Ochigʻi, bugun bu yerga kelgan kishi odamlari samimiy, atrofi yashillikka ­burkangan, ­infratuzilmasi rivojlangan kichik shaharchaga tushib qolgandek sezadi oʻzini. Massiv hududi yaqin vaqtlargacha biyday choʻl edi. Shu yerdan oʻtib-qaytayotganlar choʻlda ham koʻp qavatli uy boʻladimi, yozning issigʻida, qishning qora sovugʻida qanday yashash mumkin degan savollar berardi. Yashil belbogʻ ana shu masalaga tabiiy yechim boʻldi. Suv, gaz, elektr olib kelindi. Mana shu omillarning oʻziyoq massivlar uzoq kelajakni oʻylab, puxta reja bilan qurilayotganini anglatadi.

Bugun Surxondaryoda qurilayotgan “Yangi Oʻzbekiston” massivlari misolidagi bun­yodkorlik ishlari nafaqat arxitekturada, balki inson qalbida ham yangi nafas, yangi ruh, yangi orzu-umidlarni uygʻotayotgani shubhasiz. Zero, farovon hayot xalq roziligidan boshlanadi.

Sariosiyo tumanining Lutfikor mahallasida 31 gektardan ortiq maydonda ham “Yangi Oʻzbekiston” massivi bunyod etilyapti. Bu yerda 2026-yil oxirigacha 5, 7, 9 qavatli, jami 2322 xonadonga ega 78 ta koʻp qavatli uy foydalanishga topshiriladi. Aholi ancha zich yashaydigan hududlar uchun bunday massivlar muhim ijtimoiy ahamiyatga ega. Uy-joylarning sifati va tannarxi ham xalqning imkoniyatiga mos ekani eʼtiborga molik.

Angor tumanidagi Sharq guli mahallasida 11,2 gektarda 1005 xonadonli jami 43 ta uy qurilishi reja qilingan. Bu yerda ham energiya tejamkor materiallar ishlatilyapti, ekohududlar yaratishga, elektr, suv, gaz va yoʻl tarmoqlarini tortishdagi yangi standartlarga jiddiy eʼtibor berilgan. Shu maʼnoda, yangi massivlarni energiya tejamkorlik jihatdan ham namuna qilib koʻrsatish mumkin.

Minajatdin QUTLIMURATOV:

— Insonning baxti, avvalo, tinch va osoyishta, farovon xonadondan boshlanadi. Shu bois, xalqimiz uyni vatan ichidagi vatan deya qadrlaydi. Yurtning obodligi esa dilni ravshan qiladi. Qoraqalpogʻiston Respublikasi Qonlikoʻl tumanidagi “Yangi Oʻzbekiston” massivi shunday ezgu maqsadlar mahsulidir. Mazkur massivda istiqomat qilayotgan Nigora Zoyirova hayotidan rozi ekanini bot-bot takrorlaydi. Zamonaviy, barcha qulayliklarga ega xonadonda farzandlari bilan baxtli umr kechirmoqda.

— Yangi uyga koʻchib kelganimizdan buyon hayotimiz butunlay oʻzgardi, — deydi Nigora Zoyirova. — Xonadonimiz keng va yorugʻ. Elektr, tabiiy gaz, ichimlik suv kabi barcha qulayliklar muhayyo. Atrof obod, koʻchalar keng va ravon. Farzandlarimiz xavfsiz muhitda oʻynab, taʼlim-tarbiya olmoqda. Bunday eʼtibor va gʻamxoʻrlik uchun minnatdor boʻlmaslik mumkin emas!

Qonlikoʻl tumaniga kirib kelishingiz bilan koʻp qavatli uylar koʻzga tashlanadi. Ilgari tumanda bunday uylar boʻlmagan. Katta magistral yoʻlning boʻyida iqtisodiy va ijtimoiy infratuzilmaga ega 11 ta 5 qavatli uy qad rostlagan. Qulay sharoitlarga ega uylarda 330 xonadon bor. Bu bitta tumandagi ana shuncha oilaning quvonchi, baxtli hayot tarzining bir koʻrinishi.

— Qoʻngʻirot tumanidan ushbu koʻp qavatli uylarning biriga oilamiz bilan koʻchib oʻtdik. Ish joyim Qonlikoʻl tumanida. Imtiyozli kredit hisobidan 3 xonali uyni 20 yilga sotib oldik, — deydi “Yangi Oʻzbekiston” massivida istiqomat qiluvchi Furqat Rahimberdiyev. — Yosh oilalar uchun juda qulay. Issiq va sovuq suv bor. Qoʻshnilar ham yosh oilalar. Bir-birimiz bilan kirdi-chiqdi qilamiz. Muhimi, maktab, bogʻcha yonimizda.

Qonlikoʻl tumani Navroʻz mahallasidagi “Yangi Oʻzbekiston” massivida 12 milliard 830 million soʻm evaziga 3 qavatli, 330 oʻringa ega yangi maktab qurilgan. U eng zamonaviy asbob-uskunalar bilan jihozlagan. Yashil qoplamali stadion, sport zali, oshxona, chiroyli sinflar ushbu massivda istiqomat qiluvchi aholi bolalariga xizmat qilmoqda. Maktab 2024-2025 oʻquv yilida foydalanishga topshirilgan. Shuningdek, maktabning yonginasida 7,7 milliard soʻmga qurilgan, 180 oʻringa moʻljallangan bogʻcha ham faoliyat koʻrsatmoqda. Yangi massivlarning muhim jihatlaridan biri hududda alohida taʼlim maskanlari barpo etilayotganidir.

— Qonlikoʻl tumanidagi 25-umumtaʼlim maktabiga Hindistondan kelib dars oʻtyapmiz, — deydi xorijlik mutaxassis Saini Akansha xonim. — Turmush oʻrtogʻim Amir Ali bilan “Yangi Oʻzbekiston” massividagi koʻp qavatli uylarning birida yashayapmiz. Xonalari toza, barcha qulayliklar mavjud. Asosiysi, maktabning yonginasida.

Massiv yonida yirik korxonalardan biri — “Kanteks invest” masʼuliyati cheklangan jamiyati joylashgan. Ip-kalava ishlab chiqaruvchi ushbu korxona 2019-yil ishga tushirilgan boʻlib, yiliga 9 ming tonna mahsulot tayyorlaydi. Korxonada 600 ga yaqin mahalliy aholi ish bilan taʼminlangan. Germaniya, Turkiya va Hindistondan olib kelingan asbob-uskunalar oʻrnatilgan korxona toʻliq quvvatda ishlamoqda. Jamoaning aksariyatini yoshlar tashkil etadi.

Qonlikoʻl tumani ilgari ijtimoiy-iqtisodiy holati ogʻir tumanlardan biri edi. Oʻzbekistondagi yangilanishlar sabab u bugun butunlay oʻzgardi. Korxonalar ish boshlab, tumanning tadbirkorlar sinfi shakllanib boryapti. Bu iqtisodiyot bilan birga ijtimoiy muhit ham yaxshilanishiga xizmat qilmoqda. Bir paytlar Qonlikoʻlda tugʻilgan yoshlar shaharlarga koʻchib ketish orzusida yashardi. Endi ular oʻz uyi oldidagi maktabda xorijlik mutaxassislardan dars olmoqda. “Yangi Oʻzbekiston” massivlari kabi yirik loyihalar esa ana shu yangilanishlar ruhiga yanada koʻtarinkilik bagʻishlamoqda.

Suhbatni “Yangi Oʻzbekiston” muxbiri

Boboravshan GʻOZIDDINOV uyushtirdi.