Bu haqda Samarqand viloyati moliya bosh boshqarmasi boshligʻi B.Mirzayev xalq deputatlari viloyat Kengashi sessiyasidagi hisoboti chogʻida maʼlum qildi.

Boshqarma tomonidan kadastr, elektr tarmoqlari korxonalari, gaz idoralari va FHDYO boʻlimlardan tegishli maʼlumotlar olinib, tadbirkorlik subyektlarining hududiy soliq idoralariga taqdim etgan maʼlumotlari bilan solishtirilganda, 21,4 mlrd. soʻm qoʻshimcha daromad manbalari mavjudligi aniqlandi.

Jismoniy shaxslarga tegishli boʻlgan turar joy obyektlari qayta baholanganligi va soliq idoralari tomonidan soliq manbasi sifatida qamrab olinganligi tahlil qilinganda, viloyat boʻyicha 751 ming 228 ta turar joy obyektidan 55 ming 639 tasida turar joy mulklari mavjud emasligi koʻrsatilgan. Biroq, mahalla fuqarolar yigʻinlari jalb etilib, ushbu holatning haqqoniyligi oʻrganilganda, 12 ming 272 ta turar joyda mulklar mavjudligi, shuningdek, moliya boʻlimlari tomonidan joyiga chiqib tanlanma asosida oʻrganilganda, 906 tasida mulk obyektlari borligi aniqlandi.

Bundan tashqari, 3275 holatda yuridik korxonalar tomonidan davlat soliq inspeksiyalariga taqdim etilgan hisobotlar tahlil qilinganda, 480 holatda kadastr maʼlumoti bilan soliq toʻlovchilar oʻrtasida 481,1 gektar yer maydoni kam koʻrsatilganligi kuzatildi. Buning oqibatida ushbu yer maydonlari soliq bazasiga kiritilmagan va 7,7 mlrd. soʻm soliq hisoblanmagan.