Идора маълумотига кўра, сўнгги вақтларда ижтимоий тармоқларда ҳаж сафарига оид асоссиз ва ноқонуний эълонлар кўпайиб бормоқда.

Қайд этилишича, ўтган йили юзлаб ўзбекистонликлар ноқонуний йўллар билан ҳажга боришга уриниб, ибодатларини тўлиқ адо эта олмаган. Айримлари депортация қилинган, қамалган, ҳатто вафот этган ҳолатлар ҳам кузатилган.

Таъкидланишича, мамлакатда ҳаж сафарини ташкил этиш Ўзбекистон мусулмонлари идораси ҳамда Дин ишлари бўйича қўмита ваколатига киради. Ушбу ташкилотлар Саудия Арабистони билан расмий келишувлар асосида зиёратчиларга хизмат кўрсатади.

Шунингдек, Саудия Арабистони қонунчилигига кўра, ҳаж сафари фақат ваколатли ташкилотлар орқали амалга оширилиши белгиланган. Ноқонуний йўллар билан сафарга чиқиш қонунбузарлик ҳисобланиб, депортация ва катта миқдордаги жарималарга сабаб бўлиши мумкин.

Идора фуқароларни фирибгарлик ҳолатларига алданмасликка чақириб, зиёрат хавфсизлиги учун фақат расмий ҳаж сафарини танлашни тавсия этди.