Ферғана ўәлаятының ҳәкими Хайрулло Базаров Өзбекстан ҳәм Қырғызстан халықлары арасындағы дослық байланысларды раўажландырыўға қосқан үлеси және саўда-экономикалық мәселелердеги хызметлери ушын Қырғыз Республикасының "Данк" ордени менен сыйлықланды.
Бүгин Бишкек қаласында болып өткен мәмлекетлик сыйлықларды салтанатлы тапсырыў мәресиминде бул сыйлық Қырғызстан Президенти Садир Жапаров тәрепинен ўәлаят ҳәкимине тапсырылды.
- Өзбекстан Республикасы Ферғана ўәлаяты ҳәкими Хайрулло Базаровты "Данк" ордени менен сыйлықлаў ҳаққында қарар қабыл етилди. Бизге белгили, ол қоңсылас Баткен ҳәм Ферғана ўәлаятлары арасындағы саўда-экономикалық бирге ислесиўди раўажландырыўда үлкен рол атқарған. Оның қырғыз ҳәм өзбек халықлары арасындағы туўысқанлық қатнасықларын беккемлеў, еки мәмлекет исбилерменлериниң өз-ара бирге ислесиўин қоллап-қуўатлаўға қосқан үлесин айрықша атап өтпекшимен. Себеби, "Қоңсысы жақсы болғанның үйи тыныш," деп бийкарға айтылмаған, - деди Садир Жапаров.
