Мәмлекетимиз басшысы Россия жетекшисин туўылған күни менен қызғын қутлықлап, оған беккем денсаўлық, бахыт-ығбал ҳәм табыслар, дос Россия халқына болса раўажланыў тиледи.
Владимир Путинниң заманагөй Россияның қәлиплесиўиндеги тарийхый орны ҳәм Өзбекстан менен Россия арасындағы кең көлемли стратегиялық шериклик ҳәм аўқамласлық қатнасықларын беккемлеўге қосқан жеке үлеси атап өтилди.
Бирге ислесиў барлық бағдарларда жедел раўажланып атырғаны қанаатланыўшылық пенен атап өтилди. Өз-ара саўда көлеми, санаат, энергетика ҳәм басқа да тийкарғы бағдарларда жетекши кәрханалардың кооперациясы көлеми турақлы артып бармақта.
Күни кеше Ферғана қаласында болып өткен Ҳүкиметлераралық комиссияның гезектеги мәжилиси ҳәм Регионлар үшинши кеңесиниң нәтийжели жуўмақларына жоқары баҳа берилди.
Жедел мәдений-гуманитарлық алмасыўлар даўам етпекте: күни кеше мәмлекетимизде Россия көркем өнериниң "Көркем өнер дүньясы" фестивалы табыслы өткерилди, усы күнлери Москва қаласында Өзбекстан мәденияты күнлери өткерилмекте.
Тәреплер халықаралық ҳәм регионаллық әҳмийетке ийе актуал мәселелер бойынша да пикир алысты, болажақ илажлар режесин додалады.
