Баку қаласында Әзербайжанның Медианы раўажландырыў агентлигинде Мәлимлеме ҳәм ғалаба коммуникациялар агентлигиниң жуўапкерлери ҳәм тәжирийбе алмасыў илажларының қатнасыўшылары менен ушырасыў өткерилди.
Мағлыўмат ушын: бул ушырасыў Өзбекстан ҳәм Әзербайжан арасында медиа тараўында бирге ислесиўди беккемлеўге қаратылған "Жол картасы"нда белгиленген өз-ара сапарлар ҳәм медиа-турлар шеңберинде шөлкемлестирилди.
Ушырасыўда Әзербайжан Медианы раўажландырыў агентлиги атқарыўшы директорының орынбасары Натиқ Маммедли өзбекстанлы кәсиплеслердиң сапарынан қуўанышлы екенин атап өтип, еки мәмлекет арасындағы стратегиялық шериклик тек ғана социаллық-экономикалық ҳәм сиясий, соның ишинде, мәлимлеме тараўында да нәтийжели кеңейип атырғанын атап өтти.
Еки мәмлекетте әмелге асырылып атырған кең көлемли жаңаланыўларды глобал мәлимлеме базарында қалыс ҳәм оператив сәўлелендириўде медиа ҳәм санлы мәлимлеме тараўында бирге ислесиўди беккемлеўдиң әҳмийетине тоқтап өтти.
Сондай-ақ, ушырасыўда тәреплер "Жол картасы" шеңберинде тәжирийбе ҳәм ресурслар алмасыўын турақлы жолға қойыў, биргеликтеги жойбарларды конструктивлик әмелге асырыў және журналистлер ҳәм коммуникация тараўындағы қәнигелердиң кәсиплик шеберлигин арттырыў еки мәмлекет халқында медиа саўатлылық ҳәм мәлимлеме иммунитетин пайда етиў ҳәм қәлиплестириўге хызмет етиўи керек екенлигин атап өтти.
Сөйлесиў даўамында бундай сапар етиўлер еки мәмлекеттиң медиа тараўы ҳәм мәлимлеме сиясатындағы тығыз байланысларды және де тереңлестириўде әҳмийетли орын ийелейтуғыны атап өтилди.
Өзбекстанлы қатнасыўшылар Әзербайжанда мәлимлеме ҳәм медиа тараўында қолланылып атырған системалы қатнас, әсиресе, медиа субъектлерин раўажландырыў ҳәм санлы процесслерди жеделлестириўге қаратылған илажларды жоқары баҳалады.
Мағлыўмат орнында: сапар бағдарламасына муўапық, Мәлимлеме хызмети басшылары ушын оқыў семинарлары ҳәм ҒХҚ ўәкиллери ушын пресс-турлар өткерилиўи нәзерде тутылған.
