"Өзбекнефтгаз" акционерлик жәмийети системасында усы жылдың биринши шерегиндеги жумыс жуўмақлары, екинши шеректеги тийкарғы ўазыйпалар, сондай-ақ, өндирис ҳәм қаржы көрсеткишлериниң динамикасы көрип шығылды.
Өндирис көлемлерин турақластырыў, бар жоғалтыўлардың орнын қаплаў, қудықларды иске қосыў ҳәм оңлаў, басқа да технологиялық илажлар избе-из даўам еттирилмекте. Соның менен бирге, айырым бағдарларда қәрежетлерди оптималластырыў, дебитор қарыздарлықты қысқартыў, ресурслардан нәтийжели пайдаланыў ҳәм базар механизмлерин жетилистириў бойынша жумыслар алып барылмақта.
Қудықлардың нәтийжелилигин арттырыў ҳәм қазыў процесине заманагөй технологияларды енгизиўге айрықша итибар қаратылды. Халықаралық компаниялар менен биргеликте бир қатар технологиялық шешимлер үйренилип атырғаны, оларды басқышпа-басқыш әмелиятқа енгизиў нәзерде тутылып атырғаны атап өтилди.
Сондай-ақ, геологиялық-излеў жумысларын кеңейтиў, жаңа перспективалы майданларды анықлаў ҳәм өзлестириў жумыслары ҳаққында да мәлимлеме берилди.
Атап айтқанда, 2D ҳәм 3D сейсморазведка көлемин кеңейтиў, жаңа участкаларда бураўлаў жумысларын баслаў, бураўлаў бағдарламаларын халықаралық талаплар тийкарында шөлкемлестириў, супервайзинг, геологиялық-гидродинамикалық моделлестириў ҳәм жойбарлаў процесслерин буннан былай да жетилистириў илажлары көрилмекте. Усы жылы бир қатар жаңа кәнлерде жумыслар басланғаны, келешекте оларды кеңейтиў режелестирилгени атап өтилди.
Қыйын қазылатуғын резервлер менен ислесиў, орта мүддетли бағдарламалар шеңберинде терең ҳәм қурамалы қудықларды қазыўға алдынғы сырт ел тәжирийбесин тартыў әҳмиетли екенлиги атап өтилди.
Мәмлекетимиз басшысы өндиристиң турақлылығын тәмийинлеў, бар қуўатлықлардан нәтийжели пайдаланыў, геологиялық-излеў, бураўлаў ҳәм оңлаў жумысларын системалы шөлкемлестириў, нефть-газ тараўында финанслық тәртипти беккемлеў бойынша тапсырмалар берди.
