Мәмлекетимиз басшысы пүткил түрк халқын Түркия миллий байрамы – Республика күни менен қызғын қутлықлап, тынышлық-татыўлық, турақлы раўажланыў ҳәм абаданлық тиледи.
Сөйлесиўде Өзбекстан - Түркия кең көлемли стратегиялық шериклик қатнасықларын, соның ишинде, сиясий-дипломатиялық, саўда-экономикалық ҳәм мәдений-гуманитарлық тараўларда және де беккемлеў мәселелери ҳәр тәреплеме додаланды.
Кейинги жыллары барлық дәрежелерде жедел сөйлесиўлер жолға қойылғаны қанаатланыўшылық пенен атап өтилди. Өз-ара товар алмасыў ҳәм инвестициялардың көлеми, қоспа кәрханалар ҳәм авиақатнаўлардың саны избе-из артып бармақта. Бирге ислесиўдиң тийкарғы бағдарлары бойынша қоспа илажлар турақлы өткерип келинбекте.
Тәреплер бизнести қоллап-қуўатлаў бойынша жоқары дәрежедеги кеңести шөлкемлестириў, қоспа Ҳүкиметлераралық комиссияның гезектеги мәжилисине пуқта таярлық көриў, перспективалы жойбарлар портфелин кеңейтиў, сондай-ақ, жаңа бағдарларда әмелий бирге ислесиўди избе-из даўам еттириў әҳмийетли екенин айрықша атап өтти.
Өзбекстан ҳәм Түркия жетекшилери болажақ илажлар режеси және халықаралық ҳәм регионаллық әҳмийетке ийе актуал мәселелер бойынша да пикир алысты.
