Сапар шеңберинде Абу-Даби ҳәм Дубай қалаларында ушырасыўлар ҳәм илажлар өткерилиўи нәзерде тутылған.
Мәмлекетимиз басшысы Әмирликлер пайтахтында Президент Шайх Муҳаммед бин Зоид Ол Наҳаён менен еки тәреплеме сөйлесиўлер өткереди, мәмлекеттиң жетекши мәмлекетлик шөлкемлери, компания ҳәм банклериниң басшылары менен ушырасады, сондай-ақ, "Абу-Даби турақлы раўажланыў ҳәптелиги" халықаралық саммитинде қатнасады.
Дубай қаласында Бирлескен Араб Әмирликлери вице-президенти, Бас министри, Дубай Әмири Шайх Муҳаммад бин Рошид Ол Мактум менен ушырасыў өткерилиўи режелестирилген.
Сапар күн тәртибинен Өзбекстан-БАӘ дослық ҳәм көп қырлы шериклик қатнасықларын буннан былай да беккемлеў, инвестициялар, "жасыл" энергетика, инфраструктура, санластырыў, жасалма интеллект, инновациялық раўажланыў, туризм ҳәм басқа да көплеген тийкарғы бағдарларда әмелий бирге ислесиўди кеңейтиў мәселелери орын алған. Мәдений-гуманитарлық алмасыўды жеделлестириўге айрықша итибар қаратылады.
Халықаралық ҳәм регионаллық сиясаттың әҳмийетли тәреплери де көрип шығылады.
Жоқары дәрежедеги сөйлесиўлердиң жуўмағында еки мәмлекет арасындағы кең көлемли бирге ислесиўди буннан былай да раўажландырыўға қаратылған салмақлы келисимлер топламының қабыл етилиўи күтилмекте.
