Ушырасыў даўамында мәденият ҳәм көркем өнер тараўындағы бирге ислесиўдиң бүгинги жағдайы ҳәм келешектеги перспективалары додаланды. Аманбай Орынбаев соңғы жыллары мәмлекетимизде, атап айтқанда, Қарақалпақстанда мәденият ҳәм көркем өнерди раўажландырыўға қаратылған реформалар ҳәм Президентимиздиң басламалары себепли тараўда үлкен жетискенликлер қолға киргизилип атырғанын айрықша атап өтти.
Бизге белгили, Өзбекстан Түрксай шөлкеминиң толық ҳуқықлы ағзасы болып есапланады. Қарақалпақстан Республикасы менен Түрксай арасындағы мәдений бирге ислесиў жыл сайын жаңа басқышқа көтерилмекте. Буның айқын мысалы сыпатында өткен жылы Түрксай басламасы менен Стамбул қаласында қарақалпақ халқының уллы шайыры Әжинияз Қосыбай улының 200 жыллық юбилейи кеңнен белгиленгенин атап өтиў мүмкин.
Сондай-ақ, халықаралық дәрежеде өткерилип атырған түркий халықлар фестивальларында Қарақалпақстан көркем өнер жәмәәтлери – «Айқулаш» миллий фольклор ансамбли ҳәм Өзбекстан мәмлекетлик филармониясы Қарақалпақстан бөлими белсене қатнаспақта. Бул – түркий халықлар арасындағы руўхый ҳәм мәдений байланыстың әмелий көриниси болып есапланады.
Ушырасыўда Түрксай бас хаткери Султон Раевтың «Таж» пьесасы Қарақалпақ мәмлекетлик Жас тамашагөйлер театры сахнасында көрсетилгени де еки тәреплеме тығыз бирге ислесиўдиң және бир айқын мысалы сыпатында тән алынды.
Тәреплер Қарақалпақстанда халықаралық мәдений фестивальлар, әнжуманлар ҳәм дөретиўшилик ушырасыўлар өткериў, сондай-ақ, түркий халықлар арасындағы мәдений байланысларды буннан былай да беккемлеў бағдарындағы режелерди додалады.
Қарақалпақстан хабар агентлиги.
