Россияда "Өзбекстан мәденияты күнлери"ниң үшинши мәрте шөлкемлестирилиўи Өзбекстан ҳәм Россия арасындағы мәдений-гуманитарлық байланыслардың избе-из раўажланып атырғанынан дәрек береди. Еки күн даўамында шөлкемлестирилген илажлар ўатанласлар менен қызғын пикирлесиўден баслап, мәмлекетлераралық мәдений бирге ислесиў мәселелерин додалаў ҳәм өзбек көркем өнерин абырайлы халықаралық сахнада көрсетиўге шекемги избе-из процессти қамтып алды.
Атап айтқанда, мәденият күнлери шеңберинде Өзбекстан Республикасы мәденият министри Озодбек Назарбеков Россияда билим алып атырған өзбекстанлы жаслар ҳәм түрли тараўларда мийнет етип атырған ўатанласлар менен ашықтан-ашық сөйлести. Сөйлесиўде Өзбекстан Республикасының Россия Федерациясындағы Айрықша ҳәм толық ҳуқықлы елшиси Ботиржон Асадов та қатнасты.
Мәденият күнлериниң гезектеги әҳмийетли илажларынан бири, бул Өзбекстан Республикасы ҳәм Россия Федерациясы арасындағы экономикалық бирге ислесиў бойынша Ҳүкиметлераралық комиссияның Мәденият мәселелери бойынша киши комитетиниң алтыншы мәжилиси болды. Онда, Өзбекстан Республикасы мәденият министри Озодбек Назарбековтың Россия Федерациясы мәденият министри Ольга Любимова басшылығындағы делегация арасындағы бирге ислесиў ушырасыўы шеңберинде бир қатар келисимлерге ерисилди. Атап айтқанда, еки мәмлекет арасындағы мәденият ҳәм көркем өнер тараўындағы бирге ислесиўдиң бүгинги жағдайы ҳәм перспективалары додаланып, қоспа жойбарларды көбейтиў, дөретиўшилик жәмәәтлер алмасыўын кеңейтиў ҳәм еки халықтың бай мәдений мийрасын үгит-нәсиятлаў мәселелерине айрықша итибар қаратылды. Сондай-ақ, ушырасыў даўамында, Өзбекстан хореография академиясының ректоры Шуҳрат Тохтасимов, Өзбекстан аяқ ойыны көркем өнери дөретиўшилик бирлеспесиниң дөретиўшилик басшысы Чарос Джурабаева ҳәм Москва хореография академиясының ректоры Светлана Захарова менен меморандумға қол қойылды. Соның менен бирге, бул ушырасыў жуўмағында, Өзбекстан ҳәм Россия мәденият министрлери Озодбек Назарбеков ҳәм Ольга Любимова тәрепинен Мәденият мәселелери бойынша киши комитеттиң алтыншы мәжилисиниң протоколына қол қойылды.
Илажлардың логикалық даўамы сыпатында Москва қаласындағы Мәмлекетлик Кремль сарайында Өзбекстан Республикасы мәмлекетлик ғәрезсизлигиниң 35 жыллығына бағышланған "Жаңа Өзбекстан нуры" салтанатлы концерти қойып берилди. Концерт арқалы Өзбекстанның бай музыкалық мийрасы, миллий көркем өнери ҳәм заманагөй дөретиўшилик потенциалы Россия жәмийетшилигине кеңнен таныстырылды. Бағдарламадан миллий музыка, мақам, опера, эстрада ҳәм хореография үлгилери менен бир қатарда, өзбек ҳәм рус халықларының музыкалық мийрасын үйлестирген шығармалар да орын алды. Сахнада Өзбекстан миллий симфониялық оркестри, Юнус Ражабий атындағы Мақом ансамбли, Мукаррама Турғунбоева атындағы "Баҳор" мәмлекетлик аяқ ойын ансамбли, Өзбек миллий музыка көркем өнери институтының студентлери ҳәм белгили көркем өнер ғайраткерлери қатнасты. Сондай-ақ, Өзбекстан мәденияты ҳәм көркем өнерине бағышланған фотокөргизбе шөлкемлестирилип, мәмлекетимиздиң бай мәдений мийрасы ҳәм заманагөй дөретиўшилик жетискенликлери көрсетилди.
Мағлыўмат орнында, биринши мәденият күнлери 2021-жыл 9-12-июнь күнлери Москва ҳәм Санкт-Петербург қалаларында, екинши илажлар болса 2024-жыл 17-20-ноябрь күнлери Москва қаласында өткерилген еди. Өз-ара мәденият күнлерин шөлкемлестириў дәстүри шеңберинде 2025-жыл 28-31-май күнлери Ташкент ҳәм Самарқанд қалаларында "Россия мәденияты күнлери" де өткерилген еди.
Гезектеги "Өзбекстан мәденияты күнлери" болса халықларымызды мәденият ҳәм көркем өнер арқалы және де жақынластырып, Өзбекстан ҳәм Россия арасындағы дослық қатнасықлар және мәдений-гуманитарлық бирге ислесиўди жаңа мазмун менен байытты.
