Самарқанд ўәлаяты транспорт басқармасы ҳәм "Самарқанджолаўшытранс" мәмлекетлик мәкемесиниң жуўапкерлери Қытайдың Ченшоу қаласында болды.
Олар “Yutong” заводына барып, автобуслардың өндирис процесслери менен танысты.
112 гектар майданда жайласқан завод 30 мың пуқараны жумыс пенен тәмийинлеген. “Yutong” Өзбекстан базарына 2012-жылы кирип келди. Самарқандта заводтың 100 дана электробуси хызмет көрсетпекте.
Хызмет сапары даўамында жуўапкерлер “Yutong” заводының басшылары менен сөйлести. Самарқандта пайдаланылып атырған электробуслар санының артып баратырғанынан келип шығып, компания тәрепинен көрсетилип атырған сервис хызметлерин күшейтиў зәрүр екенлиги атап өтилди.
Буннан тысқары, Самарқанд қаласы ушын дәслепки басқышта 80, кейин ала және 250 электробус сатып алыў бойынша пикир алысылды.
“Yutong” заводының басшылары бирге ислесиў ушын бәрқулла таяр екенин билдирди.
