Жойбарға бола, тек ғана жасы толған пуқаралар онлайн ҳәм офлайн тәризде идентификациялаўдан өткеннен соң бөлип төлеўди әмелге асырыўы мүмкин болады. Биринши басқышта жаңа қарыйдарлар ушын 2 млн сумға шекемги шеклеў белгиленеди. Оны арттырыў ушын қарыз жүги көрсеткишин (ҚЖК) есаплаў талап етиледи, ол 50 проценттен артпаўы керек. Яғный, ҳәр айда бөлип-бөлип төлеў қарыздар рәсмий дәраматының ярымынан артыўы мүмкин емес, деп жазбақта Fintech & Retail.
Егер қарыйдардың басқа қарызлары бойынша мүддети өткен қарыздарлығы болса, жаңадан бөлип-бөлип төлеў имканы берилмейди. Онда қосымша төлемлердиң улыўма муғдары - процентлер, комиссия ҳәм жәриймаларды есапқа алған ҳалда - бир жылда тийкарғы қарыздың 50 процентинен артпаўы керек. Соның ушын бөлип төлеўдеги максимал артықша төлем сатып алыў суммасының ярымы менен шекленеди.
Сондай-ақ, регулятор қурамалы процентлерди есаплаўды шығарып таслаўды усыныс етпекте: кешиктириў жағдайы ушын жәрийма ямаса пеня бир мәрте қолланылады. Клиентлерге қосымша санкцияларды төлеместен мүддетинен алдын төлеў имканияты бериледи.
Орайлық банктиң атап өтиўинше, жаңа нормалар пуқаралардың артықша қарыздарлық қәўиплерин азайтыўға ҳәм бөлип-бөлип төлеўге жуўапкершиликли қатнасты қәлиплестириўге қаратылған. Ҳәзир, регуляторға бола, бөлип-бөлип төлеў базары жедел өспекте, бирақ оның үлкен бөлеги банк қадағалаўысыз жумыс алып бармақта, бул болса финанслық турақлылық ушын қәўип туўдырмақта.
