Ҳүжжет төмендегилерди нәзерде тутады:
мектепке шекемги, улыўма, арнаўлы, профессионал ҳәм жоқары билимлендириў шөлкемлеринде бирден-бир миллий билимлендириў системасын жаратыў, Ўатанға садықлық ҳәм белсенди пуқаралық позициясын қәлиплестириўдиң вертикал системасын енгизиў;
бағдарламаның тийкарғы мақсети, ўазыйпалары ҳәм мақсетлерине ерисиў ушын "Билимлендириўдиң миллий модели"н әмелге асырыў;
жас әўладты миллий кадрларға садықлық ҳәм ўатансүйиўшилик руўхында тәрбиялаўдың анық механизмлерин енгизиў.
Бағдарлама үш басқышта әмелге асырылады:
I басқыш - мектепке шекемги билимлендириў шөлкемлеринде тәрбияланып атырган 3-6 жастағы балаларда миллий өзликти түсиниў, өзин-өзи бақлаў ҳәм өзин көрсетиўге умтылыў, сондай-ақ, әтираптағы әлем менен өз ара байланыслылық көнликпелерин қәлиплестириў;
II басқыш - улыўма орта билим бериў мәкемелеринде билим алып атырған 7-18 жастағы оқыўшыларға уллы бабаларымыздың руўхый мийрасын терең үйрениў, өзине исеним, қарар қабыл етиўде еркинлик, саламат дүньяқарас, кеңпейиллик, миннет ҳәм жуўапкершилик көнликпелери сиңдириледи;
III басқышта - орта арнаўлы, кәсип-өнер ҳәм жоқары билимлендириў мәкемелеринде 16-22 жастағы оқыўшыларда миллий қәдириятларымызға ҳүрмет, белсенди пуқаралық позициясы, Ўатанымызды қорғаўға таярлық, әскерий хызметке таярлық, Өзбекстанның дүнья жәмийетшилигиндеги абырай-мәртебесин арттырыўға үлес қосыў сыяқлы пазыйлетлер қәлиплеседи.
Барлық билимлендириў мәкемелеринде ҳәр дүйшемби күни "Келешек сааты" сабағы өткерилетуғыны белгиленди.
Бағдарламада белгиленген мақсетлерге ерисиў ушын 2026-жыл 1-июньға шекем Өзбекстан билимлендириўиниң миллий модели ислеп шығылады.
Ҳәр жылы руўхый-ағартыўшылық жумысларға жуўапкер басшылар ҳәм муғаллимлер арасында республикалық таңлаў өткериледи.
Сондай-ақ, ҳүжжет пенен 2026-жылы үзликсиз билимлендириў системасында жасларды миллий қәдириятларға садықлық ҳәм ўатансүйиўшилик руўхында тәрбиялаў нәтийжелилигин арттырыў бағдарламасын әмелге асырыў бойынша "Жол картасы" тастыйықланды.
Ҳүжжет Нызамшылық мағлыўматлары миллий базасында жәрияланған ҳәм 29.01.2026-жылдан күшке кирди, деп жазады «Norma».
