Тау бөктерінде, 3 гектар аумақта орналасқан бұл демалыс кешені ықшам әрі қолжетімділігімен ерекшеленеді. Қазіргі таңда мұнда жалпы 188 орынға арналған 2 қонақүй, капсула үлгісіндегі үйлер, мейрамхана мен шаруашылық нысандары салынған. Келесі кезеңде тағы 20 осындай үй тұрғызу жоспарланған.
Шавкат Мирзиёев қонақүйлерде жасалған жағдайлармен танысты.
Жалпы алғанда, бұл өңірде туризмді дамыту мақсатында құны 1 миллиард 800 миллион АҚШ долларына бағаланған 52 жоба жүзеге асырылады. Нәтижесінде 3 300 жұмыс орны ашылып, жылына 1 миллион туристке қызмет көрсетіледі.
Паркенттің қарлы таулары тағы бір ауқымды жобаны іске асыруға мүмкіндік беруде. Бұл жерде Австрия компаниясы 1 200 гектар аумақта тау-шаңғы курортын салуды жоспарлап отыр.
Президентке осы жоба туралы ақпарат берілді. Жоба аясында 3, 4 және 5 жұлдызды қонақүйлер, шаңғы тебу және аспалы жолдар, шале үлгісіндегі үйлер, пикник алаңдары, мейрамханалар мен сауықтыру қызметтері қарастырылған.
Жоба үш кезеңде жүзеге асырылады және толық қуатында тәулігіне 15 мыңға жуық турист қабылдай алады. Шамамен 600-ге жуық сервис кешені құрылып, маусымдық қызметтермен бірге 10 мыңға жуық жұмыс орны ашылады. Бұл аймақ, Бостанлықтағы «Амирсай» курорты секілді, Ташкент облысының ірі туристік нысандарының біріне айналмақ.
Мамандармен өткен пікір алмасу барысында жобаны жетілдіру, қызмет көрсету аясын кеңейту және құрылыс жұмыстарын жеделдету мәселелері талқыланды.
