Әндіжан облысының экономикалық әлеуеті жоғары. Мемлекет басшысының биылғы ақпандағы жұмыс сапары және онда қарастырылған міндеттер аймақ дамуына қосымша серпін берді. Өнеркәсіп, кәсіпкерлік, сауда, қызмет көрсету, туризм және ауыл шаруашылығы салаларында жақсы нәтижелерге қол жеткізілді.
Сонымен бірге, пайдаланылмаған мүмкіндіктер әлі де көп. Аудандарда жүргізілген зерттеулер барысында бірқатар ұсыныстар анықталды.
Мысалы, «Алтынқөл» және «Жалақұдық» аудандарындағы 600 гектар аумақта қытайлық инвесторлар тамшылатып суару арқылы бұрыш өсіріп, қайта өңдеу жобасын бастаған. Бұл арқылы әр гектардан 15 мың доллардың өнімін экспорттау көзделген.
«Пахтаабад» ауданында Біріккен Араб Әмірліктерінің компаниясымен бірлесіп, 470 гектар аумақта шие және жидек дақылдарын өсіру қолға алынған. Кәсіпкер инвестициялық міндеттемелерін уақытылы орындағаны үшін мемлекеттен инфрақұрылыммен қамтамасыз етуді сұраған.
Облыстағы төрт құс шаруашылығы кәсіпорнының қызметін қайта жандандыру арқылы мұқтаж отбасылардан 650 адамды жұмыспен қамту мүмкіндігі анықталған.
Асака қаласындағы «ADM Electrics» кәсіпорны автомобильдерге арналған 28 түрлі сым өткізгіштер мен мультимедиа жүйелерін өндіреді. Егер «Оникс», «Трекер», «Киа сонет» сияқты модельдерде жергілікті өндіріс үлесі кеңейтілсе, кәсіпорынның қуаттылығы мен табысы артады.
Жиналыста Әндіжан облысының әкімі осындай мүмкіндіктерді орындау бойынша шешім жобасын ұсынды. Онда 2025 жылы Әндіжан облысын әлеуметтік-экономикалық дамытуға арналған мақсатты көрсеткіштер қарастырылған. Атап айтқанда, 3,1 миллиард АҚШ доллары көлемінде инвестиция игеру, 334 инвестициялық жобаны жүзеге асыру, 305 мың адамды жұмыспен қамту және 1 миллиард АҚШ доллары көлемінде экспорт жасау міндеті белгіленген.
Сонымен қатар, халық тығыз орналасқанын ескере отырып, жер мәселесінде жаңа мүмкіндіктер жасалады. Ауыл шаруашылығында пайдаланылмай жатқан аумақтар, соның ішінде төбе-қыраттардан жалпы көлемі 1800 гектар жердің санаты өзгертіледі. Бұл жерлерде өндіріс және қызмет көрсету кешендері, тұрғын үйлер салынады.
Мемлекет басшысы ұсыныстарды мақұлдап, жаңа мүмкіндіктерді тиімді пайдалану, жобаларды заманауи инфрақұрылыммен қамтамасыз ету, халықтың жұмыспен қамтылуын және табысын арттыру бойынша қосымша тапсырмалар берді.
