— Жүректің туа біткен кемістігі ауыр дерт — дейді дәрігер. — Олар жаңа туылған нәрестелер мен өмірдің бірінші жылындағы балалар өлімі жоғары орында тұр.
Аурудың дамуының негізгі 6 себебі бар. Олар төмендегілерден құралады: күйзеліс, ананың созылмалы немесе өткір жұқпалы аурулары, вирустық аурулар, гормондық және нейрогуморальды факторлар, сондай-ақ жақын туыстар арасындағы неке жатады.
Сондай-ақ, жүкті әйелдердің қан аздығы, темекі шегу, ішімдік ішу, кейбір дәрі-дәрмектерді қолдану ұрықтың сау дамуына кері әсерін тигізеді, соның салдарынан бала туа біткен кемістікпен туылуы мүмкін.
Бұл аурумен ауыратын балаларда еріннің, құлақтың және тырнақ астындағы терінің көгеруі, тершеңдік, жүректің шуы, жылдам тыныс алу, тез шаршау, тәбеттің төмендеуі, салмақ қосудың баяулауы, тыныс алу кезінде қабырғалардың сығылуы, жүрек соғысының жиілеуі сияқты бірнеше белгілер байқалады.
Оның алдын алу үшін жүктілікті жоспарламас бұрын болашақ ата-аналар тар шеңбердегі мамандардың тексеруінен өтіп, анықталған аурулардан толық емделу керек. Мұны істеудің ең тиімді жолы - жүкті әйелдерді скринингке уақытында жұмылдыру.
Денсаулық сақтау министрлігінің баспасөз қызметі.
