Аталған құжат жобасы мемлекеттік рәмізді пайдалану және оны көрсету тәртібін одан әрі нақты айқындауға, барлық аумақтарда бірыңғай тәсілді қамтамасыз етуге бағытталған. Жобада алғаш рет Мемлекет туының сапсыз (тұғырсыз) вертикалды күйде көрсетілу бейнесін жеке қосымша арқылы бекіту ұсынылуда.
Мұнда ту қабырғаға немесе басқа конструкцияға вертикал ілінген жағдайда, жарты ай мен жұлдыздар бейнесі жоғарғы оң жақ бұрышта орналасуы, ал матаның төменгі бөлігі жерден кемінде 30 сантиметр биіктікте болуы көзделуде.
Ұсынылып отырған өзгерістерге сәйкес, жергілікті мемлекеттік билік органдарының мәжіліс залдарында, сондай-ақ дипломатиялық өкілеттіктер басшыларының қызметтік кабинеттерінде туды орналастырудың нақты өлшемдері белгіленуі мүмкін.
Жобада тудың мүмкіндігінше жұмыс үстелінің артқы жағында, лауазымды тұлғаның оң жағында тұруы тиіс екені көрсетілген. Егер залда бірнеше ту орналастырылса, Өзбекстан Республикасының Мемлекеттік туы орталықта немесе оң жақта басым түрде тұруы қажет деп белгіленген.
Сонымен қатар, бұқаралық шаралар мен сапқа тұру рәсімдері барысында туды басқа тулардан кейін орналастыруға немесе алып жүруге қатаң тыйым салу ұсынылуда.
Заң жобасында Мемлекеттік туды табыттың үстіне жабуға қатысты жеке тәртіп те орын алған. Оған сәйкес, бұл рәсім мемлекет пен қоғам алдында ерекше қызмет көрсеткен тұлғалардың, сондай-ақ қызметтік борышын атқару кезінде қаза тапқан әскери қызметкерлер мен құқық қорғау органдары қызметкерлерінің жерлеу рәсімдерінде қолданылуы көзделген.
Сондай-ақ, жобада туды төңкеріп немесе оның эстетикалық көрінісін бұзатын жағдайда көрсетуге, оның үстіне қандай да бір заттар қоюға, сондай-ақ мемлекеттік рәмізге құрметсіздік білдіретін кез келген әрекеттерге тыйым салу ұсынылады.
Аталған заң жобасы ұлттық рәміздерімізге деген құрметті құқықтық тұрғыдан нығайтуға қызмет етеді деп күтілуде.
