Өзбекстанда мемлекеттік басқару, экономика секторлары мен әлеуметтік қызметтер қарқынды түрде цифрлануда. Жақында қабылданған «Өзбекстан-2030» стратегиясында бұл бағыттағы перспективалар айқындалып, Біріккен Ұлттар Ұйымының электронды үкімет рейтингінде ТОП-30-ға кіру міндеті қойылды.
Бұл рейтинг (e-Government Development Index) елдердегі сектордың дамуын көрсететін халықаралық индекс екені белгілі. Оның маңызды аспектісі – халық пен мемлекет арасындағы электронды байланысты кеңейту, қызмет көрсетуді жеңілдету, елдің инвестициялық тартымдылығын арттыру. Кейінгі жылдары Өзбекстанның орны тұрақты түрде көтеріліп, өткен жылы 69-шы орынға жайғасты.
Рейтингте үздік 30 елдің қатарына ену үшін халықаралық әдістемеге негізделген шетелдік сарапшылардың қатысуымен 6 бағыт бойынша 53 іс-шарадан тұратын «Жол картасы» әзірленді. Ол онлайн қызметтердің 112 көрсеткішін жақсартуды, 2024 жылы 700 цифрлық қызметті іске қосуды және олардың барлығын my.gov.uz сайтында біріктіруді, елді мекендер мен магистральдарды жоғары жылдамдықты интернетпен қамтамасыз етуді көздейді.
Осы үдерістерді ғылыми-құқықтық қамтамасыз ету, серіктестермен жұмыс жасау және кемшіліктерді жою мақсатында «Цифрлық Өзбекстан – 2030» стратегиясы бойынша комиссия жанынан Жобалық кеңсе құрылуда.
Мемлекет басшысы бұл ұсыныстарды мақұлдап, жоғары технологиялар саласындағы онлайн-қызметтерді және адами капиталды дамыту бойынша тапсырмалар берді. Сандық технологиялар министріне БҰҰ департаментіне (UNDESA) презентация жасау және Өзбекстанның рейтингтегі позициясын жақсартуды негіздеу тапсырылды.
