Өзбекстан халқының Ұлы Жеңіске қосқан үлесі өлшеусіз. 1941 жылы республикамыздағы халық саны 6 миллион 800 мыңнан астам адамды құрады. Соғыс басталғанда 2 миллионға жуық азамат майданға аттанды. Әрқайсысы тура мағынасында қаһарман болған осынау ардақты жандардың 500 мыңнан астамы сұрапыл шайқастарда қаза тауып, мыңдаған отандастарымыз соғыстан мүгедек болып оралды.
Халқымыз күндіз-түні тынымсыз еңбек етіп, ұрыс далаларына үлкен көлемде азық-түлік, киім-кешек, қару-жарақ, дәрі-дәрмекті үздіксіз жеткізіп отырды. Бомбалар мен снарядтар үздіксіз жарылып тұратын аймақтардан Өзбекстанға 170-ке жуық зауыт пен фабрика эвакуацияланып, қысқа мерзімде қайта іске қосылды.
Соғыстан зардап шеккен 1 миллион 500 мыңнан астам қарттар, әйелдер мен балалар Өзбекстанға көшірілді. Олардың 200 мыңнан астамы ата-анасынан айырылған жетім балалар еді.
Өзбекстанда Екінші дүниежүзілік соғысқа қатысып, майдан тылында жанқиярлықпен еңбек еткен ата-бабаларымыздың ерлігін мәңгілік етуге ерекше мән берілуде. Соғыс ардагерлері мен мүгедектері жыл сайын ынталандырылып, олардың денсаулығына көңіл бөлінуде. Ташкент қаласында Жеңіс саябағы ашылып, онда «Матонат мадҳияси» (Ерлік гимні) монументі мен «Шон-шараф» (Құрмет) мұражайы бой көтерді.
Мәскеудегі Қызыл алаңда Жеңіс шеруі өтті. Оны Беларусь Президенті Александр Лукашенко, Қазақстан Президенті Қасым-Жомарт Тоқаев, Қырғызстан Президенті Садыр Жапаров, Тәжікстан Президенті Эмомали Рахмон, Түркіменстан Президенті Сердар Бердімұхамедов және Армения Премьер-Министрі Никол Пашинян да тамашалады.
Шарадан кейін Өзбекстан басшысы өзге елдердің басшыларымен бірге Александр саябағындағы «Белгісіз солдат» монументіне гүл шоқтарын қойып, Екінші дүниежүзілік соғыста Отан қорғауда қаза тапқан жауынгерлерге, оның ішінде өзбек батырларына құрмет көрсетті.
Осымен Ресейге жұмыс сапары аяқталды. Әуежайда Өзбекстан Президенті Шавкат Мирзиёевті Ресейдің Экономикалық даму министрі Максим Решетников және басқа да ресми тұлғалар шығарып салды. Мемлекет басшысы Ташкентке қайтып оралды.
