Мемлекет басшылары Өзбекстан мен Франция арасындағы жан-жақты қарым-қатынастарды одан әрі дамыту және нығайту мәселелерін шағын құрамда және делегациялардың қатысуымен жан-жақты талқылады.
Екі ел басшыларының 2023 жылдың қараша айында Самарқандта өткен кездесуде жасалған келісімдердің жүзеге асырылып жатқаны атап өтілді.
Өзара байланыстар белсенді түрде жалғасуда. 2023 жылы екі ел арасындағы тауар айналымы алғаш рет 1 миллиард еуродан асты, ал бірлескен кәсіпорындар саны төрт есе өсті.
«Orano», «EDF», «Total», «SUEZ», «Voltalia», «Veolia» және басқа да жетекші француз компаниялары Өзбекстанда табысты жұмыс істеуде. Францияның Даму агенттігімен ынтымақтастық жаңа деңгейге көтеріліп, жаңа серіктестік бағдарламасы әзірленуде.
Сапар аясында Үкіметаралық комиссияның отырысы және «MEDEF» бизнес миссиясы нәтижелі өтті, сондай-ақ Кәсіпкерлер палатасы өз жұмысын бастады.
Осы күндері Францияның Париж, Тулуза, Лион және Ницца қалаларында аймақтардың белсенді қатысуымен бірлескен іс-шаралар ұйымдастырылып жатыр. Сондай-ақ бірлескен медициналық форум, ғылым және білім конференциясы, Өзбекстанның туристік әлеуеті мен мәдениеті туралы таныстырылымдар өтті. Гретц-Арменвиль қаласында ұлы ғалым Әбу Райхан әл-Берунидің бюсті ашылды.
Экономикалық және инвестициялық ынтымақтастықтың кеңеюіне ерекше мән берілді. Францияның жетекші компанияларымен кооперациялық жобаларды ілгерілету басты назарда болды.
Бұл реткі саммитке Жаңа инновациялық және индустриялық серіктестік бағдарламасы әзірленді. Минералды шикізатты өндіру және қайта өңдеу, энергетика, инфрақұрылым, көлік және басқа да салаларда жалпы құны 6,5 миллиард еуро болатын бірлескен жобалар жүзеге асырылмақ.
Қазіргі уақытта екі ел арасындағы жобалар портфелі 12 миллиард еуродан асады.
Осы тұрғыда қаржылық қолдау құралдарын кеңейтудің маңыздылығы атап өтілді.
Мемлекет басшысы екіжақты ұзақ мерзімді кооперациялық байланыстарды нығайту мақсатында Өзбекстан-Франция инвестициялық кеңесін құру және оның алғашқы отырысын биыл маусым айында Ташкент инвестициялық форумы аясында өткізу жөнінде ұсыныс жасады.
Аймақаралық ынтымақтастықты дамыту мақсатында келесі жылы Самарқандта екі елдің өңірлері арасындағы алғашқы форумды өткізу туралы келісімге қол жеткізілді.
Президенттер гуманитарлық саладағы ынтымақтастықты кеңейтуге ерекше назар аударды. Парижде Савицкий мұражайы топтамасындағы авангардтық өнер көрмесін ұйымдастыру, мәдени ескерткіштерді сақтау және қалпына келтіру жұмыстарын жүргізу үшін Францияның мәдени мұра институтының филиалын Өзбекстанда ашу ұсынысы қолдау тапты.
Білім саласындағы басты келісім ретінде биыл Ташкентте Өзбекстан-Франция университетін ашу белгіленді. Француз тілінің оқытушыларына арналған бағдарламалар да жалғасады.
Іскерлік, туризм және мәдени байланыстарды жандандыру үшін тікелей әуе рейстерінің санын арттыру мәселесі қарастырылды.
Мемлекет басшылары халықаралық және өңірлік маңызы бар өзекті мәселелер бойынша пікір алмасты. Көпжақты ұйымдар аясында өзара қолдау көрсету, терроризм, экстремизм, радикализм, киберқылмыс және қауіпсіздікке қатер төндіретін басқа да заманауи қауіптерге қарсы күресте күш біріктірудің маңыздылығы атап өтілді.
Жүйелі диалог орнату және үйлестіру мақсатында сыртқы істер министрліктері басшылығымен, экономикалық ведомстволардың қатысуымен Стратегиялық жоспарлау тобын құру жөнінде келісімге қол жеткізілді.
Келіссөздер қорытындысы бойынша Мемлекет басшылары екі ел арасындағы стратегиялық серіктестік қатынастарын орнату туралы тарихи шешімге келді.
Кездесу соңында Президент Шавкат Мирзиёев Президент Эммануэль Макронды өзіне қолайлы уақытта Өзбекстанға ресми сапармен келуге шақырды.
