Келіссөздер барысында Өзбекстан мен Ресей арасындағы кең ауқымды стратегиялық серіктестік пен одақтастық қатынастарды, ең алдымен, саяси, сауда-экономикалық және мәдени-гуманитарлық салаларды одан әрі дамыту және тереңдету мәселелері жан-жақты талқыланды.
Мемлекетаралық ынтымақтастықтың барлық салалары мен бағыттарын қамтитын екіжақты қарым-қатынастардың қазіргі жоғары деңгейі мен ерекшелігі атап өтілді.
– Сіздің мемлекеттік сапарыңызды тарихи деп атауға болады. Бұл сапар елдеріміз арасындағы жан-жақты стратегиялық серіктестік пен одақтастық қатынастардың жаңа кезеңінің басталуын білдіреді, – деді Шавкат Мирзиёев.
Келіссөздер барысында тараптар парламенттер, үкіметтер, министрліктер, агенттіктер, өңірлер, қоғам, сарапшылар мен іскер топтар деңгейінде белсенді байланыстарды жалғастыруға келісті.
Осы мақсатта Премьер-Министрлер деңгейіндегі Бірлескен комиссия мен Үкіметаралық комиссияның мүмкіндіктері толық пайдаланылады, оның келесі отырыстары осы жылдың соңына дейін өтеді.
Сондай-ақ тұрақты саяси консультацияларды жалғастыру, БҰҰ, ТМД, ШЫҰ сияқты халықаралық және өңірлік құрылымдар және басқа да көпжақты платформалар аясында тығыз ынтымақтастық орнату қажеттігі айтылды.
Өзара тауар айналымының тұрақты қарқыны атап өтілді. Соңғы 7 жылда ол 2,5 есеге өсті. Тараптар жаңа мақсатты көрсеткішке – жақын арада сауда көлемін 30 миллиард долларға жеткізуге келісті.
Бұл міндетті жүзеге асыруға көмектесу үшін Ресейде Өзбекстанның толыққанды сауда өкілдігі құрылады.
Бүгінгі саммитке энергетика, металлургия, мұнай-химия, машина жасау, тау-кен өнеркәсібі, ауыл шаруашылығы, логистика, фармацевтика, жасанды интеллект және басқа да көптеген салаларда құны 20 миллиард доллардан асатын жаңа өндірістік ынтымақтастық жобалары дайындалды.
Осы сынды жобаларды ілгерілету үшін бірлескен инвестициялық платформа іске қосылады.
Энергетика саласында газ тасымалдау жүйесін жаңғырту, газ, мұнай және мұнай өнімдерін жеткізу көлемін ұлғайту, көмірсутегін өңдеу жобаларын жүзеге асыру туралы келісімге қол жеткізілді.
Сонымен қатар, сапар аясында Өзбекстанда қуаты аз атом электр станциясын салу жобасын жүзеге асыру туралы келісімдерге қол қойылады.
Өңірлер арасындағы ынтымақтастық қарқынды дамып келе жатқаны ерекше атап өтілді. Өткен аптада Өзбекстанның барлық облыстарының басшылары Ресейге сапармен барды. Бүгін Мемлекет басшыларының төрағалығымен Өзбекстан мен Ресей өңірлері кеңесінің бірінші отырысы өтеді.
Сондай-ақ азық-түлік қауіпсіздігі, инновациялар, цифрлық технологиялар, жасанды интеллект, көші-қон сияқты бірқатар маңызды бағыттар қарастырылды.
Мәдениет және өнер, ғылым, денсаулық сақтау, туризм, жастар және спорт салаларында белсенді алмасу жалғасады.
Тараптар Өзбекстанда Бауман атындағы Мәскеу техникалық университетінің және Бүкілресейлік сыртқы сауда академиясының филиалдарын ашу туралы келісімді құптады.
Кездесу барысында делегация мүшелерінің қысқаша баяндамалары тыңдалды, сондай-ақ түрлі салалардағы практикалық ынтымақтастық бойынша нақты ұсыныстар айтылды.
Келіссөздер соңында Мемлекет басшылары әр бағыт бойынша іске асыру тетіктері көрсетілген «жол карталарын» қабылдауды тапсырды.
