Кездесуде Өзбекстан мен Венгрия арасындағы стратегиялық әріптестікті және көпжақты ынтымақтастықты одан әрі тереңдету мәселелері талқыланды.
Мемлекет басшысы Венгрия тарабына, әсіресе Премьер-Министрге Өзбекстан делегациясына көрсетілген жылы шырайлы қабылдау үшін ризашылығын білдірді.
Тараптар барлық бағыттарда практикалық әріптестіктің жүйелі түрде дамып келе жатқанын атап өтті. Парламенттер, үкіметтер, ведомстволар мен өңірлер деңгейінде тиімді байланыстар жолға қойылған. Сонымен қатар, БҰҰ, Түркі мемлекеттері ұйымы және басқа да халықаралық құрылымдар аясында тығыз өзара іс-қимыл жүргізілуде.
Сауда көлемі артып, экономика салаларындағы жетекші кәсіпорындар арасындағы кооперация күшеюде.
Тараптар тауар айналымын арттыру, импортты алмастыру және Өзбекстанның «GSP+» жеңілдетілген сауда мәртебесін пайдалана отырып, алғашқы кезеңде өзара сауданы 500 миллион еуроға жеткізудің маңыздылығын атап өтті.
Осы мақсатта Еуропа Одағы талаптарына сай зертханаларды аккредитациядан өткізу, алдын ала сертификаттау бағдарламасын енгізу және экспорттаушы компанияларды қолдайтын бірлескен платформа іске қосылады.
Бүгінде тараптар жүзеге асырып жатқан бірлескен инвестициялық жобалар портфелі 500 миллион долларды құрайды. Ағымдағы сапар аясында тағы 1,5 миллиард еуроға бағаланатын жаңа жобалар әзірленгені айтылды.
Венгрияның «OTP» банкі Өзбекстан қаржы нарығына кіруі Венгрия мен Еуропа бизнесі үшін қуатты ынталандыру факторы болғаны ерекше атап өтілді. Банкпен қаржыландыру құралдарын кеңейту туралы келісімге қол жеткізілді. Атап айтқанда, автонесиелеуді дамытуға арналған бірлескен компания құру және бизнесті қолдау бағдарламасын іске қосу жоспарлануда. Сонымен қатар, Сырдария облысында ірі құс шаруашылығы кластерін құру белсенді түрде жүріп жатыр.
Сол күні таңертең өткен венгриялық бизнес-қауымдастықпен кездесуде көлік инфрақұрылымын жаңғырту, автожолдар мен логистикалық орталықтар салу, коммуналдық желілерді дамыту, дайын тоқыма өнімдері, құрылыс материалдары, химиялық және фармацевтикалық өнімдер өндіру, цифрлық технологиялар мен балық шаруашылығы сынды бағыттарда жаңа жобаларды іске асыру туралы келісімдерге қол жеткізілді.
Аталған өндірістерді Өзбекстанда орналастыру үшін Венгряның «Inpark» операторының басқаруындағы еуропалық компанияларға арналған арнайы индустриялық аймақ құрылып жатқаны айтылды.
Жалпы алғанда, шілде айында Будапештте өтетін Үкіметаралық комиссияның кезекті отырысында Инвестициялық әріптестік бағдарламасын әзірлеу және қабылдау туралы келісімге қол жеткізілді.
Сондай-ақ, Өзбекстан–Венгрия Іскерлік кеңесінің қызметін қайта жандандыру және оның кезекті отырысын жақын уақытта бизнес өкілдерінің кең қатысуымен өткізу ұсынылды.
Өткен жылғы қазан айында Қоқан қаласында өткен бірінші Өңірлер форумының жемісті нәтижелері оң бағаланды. Өңіраралық байланыстарды қолдау мақсатында Венгрияда екінші форумды жоғары деңгейде өткізуге дайындық жүргізу туралы келісімге қол жеткізілді.
Сондай-ақ, іскерлік, туризм және мәдени алмасуларды жандандыру мақсатында екі ел арасында тікелей әуе қатынасын дамыту мәселелері қаралды.
Мәдени-гуманитарлық саладағы ынтымақтастықты кеңейтуге ерекше назар аударылды.
Өткен жылдың қазан айында Лакителек қаласында ұлы шайыр Әлішер Науаи бюсті ашылғаны және биыл қаңтарда Будапештте Өзбек киносы күндері өткендігі атап өтілді.
Келесі жылды Өзбекстан мен Венгрияның Мәдениет жылы деп жариялау ұсынылды. Осыған орай, Венгрия мемлекеттік опера театры сахнасында «Лазги» балетін қою және Будапешттегі Этнография музейінде өзбек мәдениеті көрмесін өткізу жоспарланған.
Білім беру саласындағы әріптестік те жалғасады. «Stipendium Hungaricum» бағдарламасы аясындағы ынтымақтастықты жалғастыру, екі елде өзара мойындалатын дипломдар жүйесін енгізу және Өзбекстанда венгриялық жоғары оқу орындарының филиалдарын ашу мүмкіндіктері қарастырылды.
Сонымен қатар, биыл Ташкент қаласында Өзбекстан мен Венгрия ректорларының үшінші форумын өткізу ұсынылды.
Кездесу барысында Көшбасшылар халықаралық және аймақтық маңызы бар өзекті мәселелер бойынша пікір алмасты. Терроризм, экстремизм, есірткінің заңсыз айналымы, адам саудасы және басқа да заманауи қауіп-қатерлерге қарсы күресте ынтымақтастықты жалғастырудың маңыздылығы атап өтілді.
Қабылданған келісімдердің орындалуын бақылау мақсатында жауапты министрліктерге бірлескен «жол картасын» әзірлеу тапсырылды.
Кездесу соңында Президент Шавкат Мирзиёев Венгрия Премьер-Министрі Виктор Орбанды жауап сапарымен Өзбекстанға келуге шақырды.
