Кездесу басында Мемлекет басшысы ҚХР басшысына сапармен келуге шақырғаны және Жаңа Өзбекстандағы реформаларды жоғары бағалағаны және жылы лебізі үшін шын жүректен ризашылығын білдірді.
Мемлекет басшылары кейінгі жылдары екіжақты қарым-қатынастарды дамытуда үлкен серпінге қол жеткізілгенін атап өтті.
Барлық деңгейдегі байланыстар жанданып, саяси диалог нығайып, елдеріміз маңызды мәселелер бойынша бір-бірін қолдап келе жатқаны атап өтілді.
Өткен жылдың қараша айында Бейжің қаласында Сыртқы істер министрлерінің стратегиялық диалогының бірінші отырысы өтті. Парламентаралық ынтымақтастық жандана түсті.
Мемлекет басшысы Қытай Халық Республикасының Төрағасына жеке көңіл бөліп, кедейшілікпен күрестегі ынтымақтастықты қолдағаны үшін алғыс айтты.
Тараптар Өзбекстанда Қытайдың «Лу Бань шеберханасы» кәсіптік білім беру жүйесін енгізу бойынша пилоттық жобаның басталуын құптады.
Сауда-экономикалық және инвестициялық ынтымақтастық қарқынды дамып келеді.
Өткен жылдың соңында тауар айналымы 14 миллиард долларға жетті. Жақын арада мұны 20 миллиард долларға жеткізуге барлық мүмкіндік бар екендігі айтылды.
Кейінгі жылдары Қытайдан Өзбекстан экономикасына құйылған инвестиция көлемі бес есеге, бірлескен кәсіпорындар саны үш есеге өсті.
Инфрақұрылым, өнеркәсіптік кооперация, ауыл шаруашылығындағы технологиялар трансферті және «жасыл» энергетика салаларындағы ынтымақтастық бағдарламаларын дайындау және қабылдауға келісілді.
Осы тұрғыда өткен жылдың соңында Қытай компанияларының қатысуымен Өзбекстанда қуаттылығы 1000 мегаватт болатын екі жаңа күн электр стансасы іске қосылғаны атап өтілді.
Қытайдың жетекші банктері, «Жібек жолы» қоры және Азия инфрақұрылымдық инвестициялар банкімен тиімді қаржылық және техникалық ынтымақтастықтың бүгінгі деңгейі жоғары бағаланды.
Мемлекет басшысы инвестициялық жобаларды қолдаудың қаржылық мүмкіндіктерін кеңейту, оның ішінде бірлескен платформа құру туралы қол жеткізілген келісімді, сондай-ақ Қытай Эксимбанкінің Ташкент қаласында Орталық Азия бойынша өңірлік өкілдігін ашу туралы шешімін құптады.
Президент қытайлық әріптестерді Өзбекстандағы мемлекеттік кәсіпорындар мен банктерді жекешелендіру үдерісіне белсенді қатысуға шақырды.
Көшбасшылар өңіраралық алмасулардың жандануына жылы лебіз білдірді. Осыған байланысты ынтымақтастықты үйлестіру мақсатында Өзбекстан мен Қытайдың аймақтық кеңесін құру туралы келісімге келді.
«Бір белдеу, бір жол» бастамасы аясында Трансөңірлік көліктік-транзиттік көпірдің маңызды құрамдас бөлігі болатын Қытай-Қырғызстан-Өзбекстан темір жолын салу бойынша практикалық жұмыстарды бастау маңызды екені баса айтылды.
Күні кеше Бейжіңде бірінші білім форумы мен Шанхайда Өзбекстанның туристік мүмкіндіктері көрмесі сәтті өткені айтылды. Осы күндері өтіп жатқан Өзбекстанның мәдениет күндері аясындағы шаралар Қытай астанасының тұрғындары мен қонақтарының үлкен қызығушылығын тудырды.
Білім және туризм саласындағы ынтымақтастықты жандандыру, өзара мәдениет күндерін өткізу тәжірибесін жалғастыру қажеттігі көрсетілді. Бірлескен Жастар инновациялық форумын өткізу ұсынылды.
Барлық жоспарланған іс-шаралар мен бастамаларды жүзеге асыру мақсатында тараптар осы жылдың бірінші жартыжылдығында Үкіметаралық комитет пен оның барлық кіші комитеттерінің отырыстарын өткізуге келісті.
Сондай-ақ өңірлік күн тәртібі мен халықаралық саясаттың өзекті мәселелері бойынша пікір алмасылды.
«Бір Қытай» саясаты мен «үш зұлым күшке» қарсы күрес ұстанымының өзгермейтіні расталды.
Келіссөздер соңында Өзбекстан басшысы ҚХР басшысын Өзбекстанға сапармен келуге шақырып, достас Қытай халқын келе жатқан қытайша Жаңа жылы – «Чунь Цзе» мерекесімен құттықтады.
Кездесу әдеттегідей сенім, ашықтық және достық рухында өтті.
