Өзбекстанның агроөнеркәсіп кешені тиімділік пен нарықтық қатынастар тұрғысынан жаңғыртылуда. Салаға озық агротехнологиялар мен ғылыми жетістіктер белсенді түрде енгізілуде.
Бірқатар мамандар жақында Қытай, Италия және Жапонияға барып, ғылыми институттардың, ірі компаниялар мен шаруашылықтардың тәжірибесін үйренді. Осы негізде жаңа ынтымақтастық жоспарлары әзірленді.
Жоғары өнімділіктің негізгі факторы – сапалы тұқым. Қытай ауыл шаруашылығы академиясы бұл салада үлкен тәжірибеге ие. Өзбекстанда ауыл шаруашылығына маманданған 14 ғылыми институт және 55 тұқым шаруашылығы бар, алайда жаңа сұрыптар мен агротехнологиялар саласында шешімін таппаған мәселелер жеткілікті. Жергілікті фермерлер өздерінің тұқымдарынан пайда көрмегендіктен, шетелдік тұқымдарға көбірек жүгінуде.
Осыған байланысты Жоғары Шыршық ауданындағы Агроқызмет көрсету орталығында Қытай тәжірибесі негізінде тұқым және көшет шаруашылығын дамыту жоспарланып отыр. Бұған 200 миллион доллар көлемінде инвестиция тартылып, мақта, бидай, күріш, жүгері, жүзім және жеміс-жидек дақылдарының сұрыптары көбейтіледі. Тұқым алудан бастап, оны заманауи техника мен дрондар арқылы егу, өңдеу, жинау және қайта өңдеу бойынша үлгілік аймақ құрылады.
Кадр мәселесі ауыл шаруашылығы үшін аса маңызды. Бұл тұрғыда Италияда сапалы білім беру жүйесі қалыптасқан. Болонья университеті Еуропаны жоғары білікті мамандармен қамтамасыз етуде ерекше рөл атқарады. Италияның ғылыми институттары жеке секторлармен ынтымақтастық орнатып, сұранысқа сай сұрыптар әзірлеп, оларды коммерцияландыруда.
Италияның озық тәжірибесін меңгеру мақсатында осы жылы Болонья, Тушия, Феррара және Пиза университеттеріне 200 жас жіберілуі көзделген. Сонымен қатар, Тушия университеті жылына 30 азық-түлік технологын грант негізінде оқыту және Өзбекстанда кадрлар даярлау бағдарламасын енгізу туралы ұсыныс білдірген.
Әлемдік тәжірибені зерттеуде оқу және жұмыс істеу бағдарламалары үлкен маңызға ие. Мысалы, Самарқанд аграр институты мен Халықаралық ауыл шаруашылығы университеті өткен жылы бір топ студентті Германия мен Ұлыбританияға тәжірибеден өтуге жіберді. Сондай-ақ Ташкент мемлекеттік аграр университеті, Халықаралық ауыл шаруашылығы университеті және Ферғана азық-түлік институтында студенттерді Жапонияға жіберу үшін жапон тілі орталықтарын ұйымдастыруда.
Таныстырылым барысында бұл бастамалар қолдау тауып, осындай ынтымақтастықты Венгрия, Нидерланды, Канада, Австралия, Оңтүстік Корея сияқты ауыл шаруашылығы дамыған елдермен кеңейту қажеттігі атап өтілді. Ауыл шаруашылығы министрлігіне аймақтарда инновациялық жобаларды көбейтуге арналған арнайы бағдарлама әзірлеу тапсырылды.
