Бұл мәселе бойынша Мемлекет басшысы биыл 7 мамырда өткен видеоселекторлы жиналыста тапсырма берген болатын. Осыған орай, сала мамандары, халық өкілдері және жеке сектор қатысуында бірқатар ұсыныстар дайындалды.
Қазіргі таңда ауруларды емдеудегі негізгі жүктеме республикалық мекемелерге түсіп отыр. Сол себепті облыс және аудан деңгейінде қызметті кеңейтіп, медицинаны халыққа жақындату шаралары қабылданып жатыр.
Осы мақсатта 500 клиникалық протокол халықаралық талаптарға сәйкестендіріліп, стандартты хирургиялық операциялар енгізіледі. Ең көп тараған аурулар бойынша науқастардың емдеу жолдары әзірленіп, толықтай цифрландырылмақ.
Соңғы жылдары инсульт пен инфарктқа алып келетін гипертония, жүректің ишемиялық ауруы және қант диабеті көбеюі байқалған. Мұндай жағдайлардың 85 пайызы мүгедектікке жеткізіп отыр.
Сондықтан алғашқы буында жасанды интеллектті кеңінен қолдана отырып, бұл аурулардың алдын алу және емдеу үшін жаңа протоколдар енгізу ұсынылды. Атап айтқанда, ЭКГ-телеметрия, телемедицина, тромболизис терапиясы, стенттеу және тромбоэкстракция жолға қойылады. Инсульт белгілерін ерте анықтау алгоритмін халыққа үйретуге ерекше назар аударылады.
Неврологиялық аурулар мен инсультті тиімді емдеу мақсатында Ұлттық неврология және нейрореабилитация медициналық орталығы құрылады. Орталық үшін Ташкент қаласында 250 орындық заманауи ғимарат салынып, жылына 3 мыңнан астам хирургиялық операция жасау мүмкіндігі болады.
Бұл орталық, сондай-ақ Самарқанд пен Бұхарадағы медициналық ЖОО клиникалары заманауи жабдықтармен қамтылады. Жапониялық әріптестер көмегімен халықаралық стандарттарға сай ерте реабилитация қызметі енгізіледі. 150 маман шетелде тәжірибеден өтеді. Жобаға 150 млн АҚШ доллары бағытталады. Аталған шаралар мүгедектік пен еңбекке жарамсыздықты азайтуға мүмкіндік береді.
Сонымен қатар, қазіргі денсаулық сақтаудағы жүйені картаға түсіру және цифрландыру, сол негізде медицина мекемелерін бірыңғай тәсілмен ұйымдастыру бойынша мастер-жоспар жасалады. Бұл жұмыстар аясында жаңа құрылыс стандарттары, үлгілік поликлиника және аурухана жобалары дайындалып, 210 санитарлық норма қайта қаралады.
Бүгінгі таңда халықтың зертханалық талдауларға деген сенімі біршама төмен. Зертханалық қызметтің әлсіздігі профилактика мен емдеуді қиындатып отыр. Аудан деңгейіндегі 2800 емханаға небәрі 1500 зертхана қызмет көрсетуде, олардың жабдықтарының басым бөлігі ескірген, кейбір талдаулар қолмен орындалады.
Осыған байланысты 2030 жыл соңына дейін 198 орталықтандырылған зертхана ашу, сапаны ішкі және сыртқы бақылауды енгізу, процестерді толық цифрландыру жоспарланған. Сонымен бірге тегін талдаулар саны көбейтіледі.
Кәсіби әрі жоғары медициналық білім беруді жетілдіру мәселесіне айрықша назар аударылды.
Мейірбикелер академиясын Ташкент мемлекеттік медицина университеті жанындағы Кәсіби медицина академиясына айналдыру ұсынылды. Халықаралық серіктестермен жаңа бағдарламалар енгізіліп, NCLEX емтиханы негізінде халықаралық сертификаттау жүргізіледі. Жоғары білімді мейірбике даярлау бағыты бойынша қабылдау квотасы кезең-кезеңімен артады.
Бұдан бөлек, барлық оқу бағдарламалары халықаралық ұйымдар талаптарына сай аккредитациядан өтіп, отбасылық медицина бойынша интеграцияланған оқу бағдарламасы және бір жылдық интернатура енгізіледі. «Науқас жанында» оқыту үлесі артып, білімді бағалаудың екі сатылы жүйесі және медицина қызметкерлерін тіркеу жүйесі кезең-кезеңімен енгізіледі.
Жеке бағыт қоғамдық денсаулық сақтау саласына байланысты. Санитариялық-эпидемиологиялық тыныштық және қоғамдық денсаулық сақтау комитетінің қызметін жұқпалы емес аурулардың алдын алуға, ана мен бала өлімін азайтуға, жарақаттанудың алдын алуға бағыттау ұсынылуда. Осы мақсатта жұқпалы емес аурулардың алдын алу бойынша ұлттық бағдарлама әзірленеді.
Қан қызметін жетілдіру бойынша 2026–2030 жылдарға арналған бағдарлама қабылданып, медицина мекемелерін қанмен қамтамасыз ету 100 пайызға жеткізілмек. Қан препараттары өндірісі жолға қойылады. Қауіпсіздікті қамтамасыз етудің заманауи әдістері, соның ішінде вирусты инактивациялау және сәулелендіру енгізіледі. Бұл өлім жағдайларын азайтып, қанға деген сұранысты қамтамасыз етуге мүмкіндік береді.
Өзбекстанның фармацевтика нарығы бүгінде 2 млрд доллардан асқан. Реформалар халықты сапалы, қауіпсіз әрі тиімді дәрі-дәрмекпен қамтамасыз етуге бағытталған.
Дәрі-дәрмектерді тіркеуде ДДСҰ талаптарына сай тану тәртібі енгізіледі. Дженериктердің биоэквивалентті сынақтары жүргізіледі, медициналық бұйымдарды қауіпсіздік сыныптары бойынша тіркеудің жіктелген жүйесі қолданылады. Сонымен бірге қызметті бастау үшін хабарлама тәртібі енгізіледі.
Шартты өндіріс пен технология трансфері дамытылып, фармбақылаудың заманауи механизмдері енгізіледі.
Мемлекет басшысы ұсыныстарды қолдап, тиісті құжаттарға қол қойды. Белгіленген міндеттердің сапалы әрі жүйелі орындалуын қамтамасыз ету бойынша тапсырмалар берілді.
