Өзбекстанда спортпен шұғылдануға жасалған жағдайдың арқасында халық арасында ол кеңінен таралуда. Жастар үнемі дене шынықтырумен айналысады және көбі оны мамандық ретінде таңдауда. Кәсіби спортшылар халықаралық жарыстарда үлкен жетістіктерге жетуде.
Мемлекет басшысы әрқашан салауатты өмір салтын қалыптастыру, жастарды жұмыспен қамту, олимпиада және паралимпиада қозғалыс мәселелеріне үнемі ерекше көңіл бөледі. Осы жылдың 23 мамырында өткен бейнеселектор жиынында спорттық білім беруді дамыту және осы салаға ғылыми тәсілдерді қолдану міндеті қойылды.
Бүгінгі презентацияда осыған байланысты дайындалған жоспарлар мен ұсыныстар қарастырылды. Олар үш маңызды бағытты қамтиды: біріншісі – Өзбекстан мемлекеттік дене тәрбиесі және спорт университеті мен оның Нөкіс және Ферғана қалаларындағы филиалдарында білім сапасын арттыру, екіншісі – спорттық білім беру мекемелеріндегі басқару жүйесін жетілдіру, үшінші – саладағы ғылыми зерттеулер жүйесін жетілдіру болып табылады.
2023-2024 оқу жылынан бастап білім беру бағдарламалары жетекші шетелдік жоғары оқу орындарының бағдарламалары бойынша қалыптастырылатын болады. Барлық бакалавриат және магистратура курстарына қойылатын біліктілік талаптары қайта қаралып, оқытушылар мен бітірушілердің білімін, біліктілігін және педагогикалық шеберлігін бағалау үшін құзыреттілік сертификатау жолға қойылады.
Бүгінде өзектілігі жоқ 5 бакалавриат курсы жабылып, 2 магистратура мамандығы ашылады. Оқу-жаттығу процесіне федерациялардың тәжірибелі мамандары мен шетелдік сарапшылар шақырылады.
Спорт саласында құрметті атағы мен санатты деңгейі бар, халықаралық беделді жарыстарда жеңімпаз атанған талапкерлер кәсіптік емтихандарды тапсырудан босатылады. Студенттерді ынталандыру үшін «Пахлауан Махмуд» атындағы мемлекеттік стипендия енгізіледі. Дарынды түлектерге спорт төрешісі және екінші дәрежелі жаттықтырушы мәртебесі беріледі.
Білім мен ғылым арасындағы байланысты нығайту үшін бірыңғай мониторингтік кеңес құру жоспарлануда. Бұл кеңес спорт мекемелерінің басқару, оқу-әдістемелік, ғылыми-зерттеу және рухани-ағартушылық қызметін тиімді ұйымдастыруға көмектеседі.
Сондай-ақ, Дене шынықтыру және спорт университетінің ғылыми әлеуетін 45 пайызға жеткізу, профессор-оқытушылар құрамының тиімділігін арттыру, жаңа әзірлеме және технологияларды енгізу, халықаралық рейтингтерге шығу міндеттері алға қойылуда.
Дене шынықтыру және спорт ғылыми-зерттеу институтына спорт биомеханика, физиология, фармакология және генетика бойынша зерттеулер жүргізу, ғылыми және инновациялық қызмет нәтижелерін трансферттеу және коммерцияландыру, стартап жобаларды жүзеге асыру сияқты жаңа міндеттер жүктелді.
Сондай-ақ ғылыми зерттеулерді қолдау және тиімділігін арттыру, философия докторы (PhD) дәрежесін қорғау үшін шетелдік оқу орындарына жас кадрларды жіберу қарастырылған.
Ташкент қаласының «Яшнабад» ауданында Олимпиада қалашығы салынып жатқаны белгілі. Азия ойындарынан кейін бұл кешенде 2025 жылы жұмысын бастайтын Өзбекстанның Спортты дамыту министрлігі, спорт федерациялары мен Мемлекеттік спорт академиясы орналасуы жоспарланған.
Мемлекет басшысы бұл ұсыныстарды мақұлдап, қосымша тапсырмалар берді.
