Ирригация және мелиорация шараларының нәтижесінде кейінгі бес жылда 826,5 мың гектар жер ауыл шаруашылығында пайдаланатын жерлер қатарына енгізілді. Оның 409 мың гектары суармалы жерлер қатарына енсе, ал 418 мың гектары суармалы және жайылымдық алқаптарда жер асты суларын пайдалану мен суды аз қажет ететін дақылдарды өсіру арқылы игерілді.
Таныстырылымда 2030 жылға дейін тағы да 938 мың гектар жайылымдық жерлерді игеру және олардың жағдайын жақсарту жоспары ұсынылды.
Атап айтқанда, 2026–2027 жылдары 620 мың гектар жайылым қалпына келтіріліп, оның 300 мың гектарына жайылым өсімдіктері егіледі, 130 мың гектар аумақта құдықтар орнатылады. Нәтижесінде 960 мың бас ұсақ мал өсіруге, ет пен жүн өндіру көлемін арттыруға мүмкіндік туады.
Жаңа жерлерді игеру барысында әрбір өңір бойынша нақты инвестор мен жоба негізінде жұмыс ұйымдастыру қажеттігі атап өтілді.
Ауыл шаруашылығы ғылымын жаңа деңгейге көтеру үшін қолданыстағы институционалдық инфрақұрылымды өзгертетін уақыт келгені айтылды. Осыған орай саладағы 22 ғылыми орталық, 260 зертхана және 2,5 мыңнан астам ғалым мен ғылыми қызметкерді біртұтас құрылым – Ауыл шаруашылығы ғылымдары академиясына біріктіру көзделген.
Сонымен қатар, таныстырылымда биотехнология мен молекулалық биология, гендік инженерия және гибридті тұқым шаруашылығы, «ақылды» ауыл шаруашылығы, ғарыштық және дрон технологиялары, жер деградациясы мен құнарлы топырақ, органикалық ауыл шаруашылығы және азық-түлік қауіпсіздігі, ветеринария, цифрлық ауыл шаруашылығы академия қызметінің басым бағыттары ретінде белгілеу ұсынылды.
Академия қызметінің тиімді жұмысын жолға қою бойынша нақты шаралар белгілі болды.
Ауыл шаруашылығына кадр даярлау мәселесіне де ерекше назар аударылды. Қазіргі таңда Ташкент мемлекеттік аграрлық университетінде 13,6 мың студент білім алып жатыр. Алайда оқу үдерісінің практикамен жеткілікті байланыс болмауының салдарынан түлектердің небәрі 55 пайызы ғана өз мамандығы бойынша жұмыс істеп жүргені айтылды.
Осыған байланысты білім беру, ғылыми зерттеу және өндірісті өзара тығыз байланыстыратын жүйе қалыптастыру, еңбек нарығы талаптарына сай білікті мамандар даярлау алға қойылған басты бағыттардың бірі болды.
Атап айтқанда, алдағы уақытта университеттің 6,8 мың студенті өндірістік ұйымдарда, кәсіпорындар мен агрокластерлерде, ал 2,6 мыңнан астамы Ауыл шаруашылығы министрлігі жүйесіндегі 22 ғылыми-зерттеу институтында тәжірибеден өтеді.
Сонымен қатар фермерлер мен олардың қызметкерлерінің балалары тестілеу барысында шекті балл жинай алмаған жағдайда, жеңілдетілген келісімшарт негізінде университетке қабылданады. Сондай-ақ жеті білім беру бағыты бойынша оқу мерзімін 4 жылдан 3 жылға қысқарту ұсынылды. Бұдан бөлек, студенттерді тракторшы-машинист куәлігін алуға және агродрондарды пайдалануға үйрету жүйелі түрде жолға қойылады.
Тұсаукесер барысында Агроөнеркәсіпті дамыту агенттігінің қызметі де қаралды.
Өткен жылы 44 мың гектар тиімсіз орындарда интенсивті және индустриялық бау-бақша мен жүзім алқабы құрылып, 37 мың жұмыс орны ашылды.
Атаулы бақтар мен жүзім алқаптары 2027 жылдан бастап өнім беріп, жылына 660 миллион доллар көлемінде жеміс-көкөніс экспортын жүзеге асыруға мүмкіндік береді. Атап айтқанда, «Сох» ауданында 500 гектар аумаққа алма, таңқурай және өрік, «Термез» ауданында 164 гектар жерге өрік пен шабдалы, «Ахангаран» ауданында 309 гектар, «Булунғур» ауданында 550 гектар, «Қува» ауданында 60 гектар алқапқа «Аватар» жүзім сорты егілді. Ал «Поп» ауданында 504 гектар аумақта шабдалы мен алхоры плантациялары салынды.
Бұл бастаманы жалғастырып, 2026 жылы 25,5 мың гектар жеміс бау-бақша мен 5 мың гектар жүзім алқабын пайдалануға беріп, 48 мың тұрақты және маусымдық жұмыс орнын ашу қажеттігі атап өтілді.
Қазіргі уақытта елге жыл сайын 60 миллион доллар көлемінде көшет импортталады. Осы көшеттерді Еуропа стандарттары негізінде ел ішінде өсіруге барлық мүмкіндік бар екені айтылды.
Аталған бағытта агенттік тарапынан 200-ден астам жеміс түрінің вируссыз, жоғары өнімді аналық сорттары коллекциясы қалыптастырылған. Бұл көшеттерді көбейтіп, барлық өңірлерге жеткізу үшін«Бектемір» ауданында 50 гектар, «Жоғары Шыршық» ауданында 75 гектар аумақта «ин витро» зертханалары мен аналық көшет дайындайтын кешендер құрылуда. Бұл кешендерді жыл соңына дейін іске қосып, жылына 27 миллион дана көшет өндіру міндеті жүктелді.
Мемлекет басшысы талқыланған мәселелер бойынша жауапты тұлғаларға тиісті тапсырмалар берді.
