Қонунда, хусусан, 90 кун ва ундан зиёд муддат давомида чет элда бўлиб қайтган 18 ёшдан 60 ёшгача бўлган фуқаролар, Ўзбекистонда доимий яшовчи хорижий фуқаролар ва фуқаролиги бўлмаган шахслар, шунингдек, мамлакатга меҳнат фаолияти мақсадида кириб келаётган хорижий шахсларни мажбурий ОИВ/ОИТС тиббий кўригидан ўтказиш белгиланмоқда.
Текширув Ўзбекистон фуқаролари учун Давлат бюджети ҳисобидан, чет элликлар учун эса ўз маблағи ёки иш берувчи ҳисобига амалга оширилади. Шу билан бирга, ОИВ/ОИТС ва сил касалликлари аниқланган тақдирда, бундай шахсларга Ўзбекистонда меҳнат фаолиятини амалга ошириш ҳуқуқини берувчи тасдиқнома рад этилади.
Қонун билан шунингдек, хорижда иш излаётган фуқароларни қабул қилувчи мамлакат қонунчилиги ва қоидалари бўйича ўқитиш хусусий бандлик агентликлари учун мажбурий шарт этиб белгиланди.
Сенаторлар ушбу қонунни аҳоли саломатлигини муҳофаза қилиш ва меҳнат миграциясида ижтимоий хавфсизликни таъминлашга қаратилган муҳим ташаббус сифатида баҳоладилар.
Маълумот учун, 2024 йилда узоқ муддат чет элда бўлиб қайтган 1,7 млн фуқаронинг фақат 434 минги ёки 25 фоизи ихтиёрий равишда ОИВ/ОИТСга текширилган.
Уларнинг 1 512 нафарида бундай касаллик аниқланган. Шунингдек, 2024 йилда 12,7 мингдан ортиқ чет эл фуқаролари ва фуқаролиги бўлмаган шахслар ихтиёрий равишда ОИВ/ОИТСга текширилган ҳамда уларнинг 81 нафари бундай касалликка чалингани аниқланган.
