Янги музей Лазги рақси ҳамда Авесто тарихи ва меросини кенг жамоатчиликка етказишга хизмат қилади. Музейда ноёб экспонатлар, замонавий экспозициялар ва ахборот-коммуникация технологиялари асосида ташкил этилган кўргазмалар намойиш этилади.

Қарорга кўра, музей фондини шакллантириш, экспонатларни асраб-авайлаш, ёш авлодни тарихий ва маданий меросга ҳурмат руҳида тарбиялаш, шунингдек, маҳаллий ва хорижий сайёҳларни жалб қилиш асосий вазифалар этиб белгиланган.

Экспозицияларни ташкил этишда замонавий технологиялар ва жаҳон музейшунослиги тажрибасини жорий этиш ҳам кўзда тутилган.

Музей фаолияти Хоразм вилояти маҳаллий бюджети, музейнинг ўз даромадлари, ҳомийлик хайриялари ҳамда қонунчиликда тақиқланмаган бошқа манбалар ҳисобидан молиялаштирилади.

Шунингдек, Хоразм вилояти ҳокимлигига 2026 йил 1 июлга қадар бинода таъмирлаш ишларини амалга ошириш, экспозиция яратиш ва моддий-техник базани шакллантириш вазифаси юклатилди. Музейни малакали кадрлар билан таъминлаш чоралари ҳам кўрилади.

Қайд этилишича, мазкур музей Хоразмнинг бой маданий меросини замонавий талқинда намойиш этувчи, маърифий ва туристик аҳамиятга эга муҳим масканлардан бирига айланиши кутилмоқда.