Мазкур тадбир хотин-қизларнинг сиёсий фаоллиги, хусусан, электорал маданиятини ошириш соҳасида парламент, жамоат ташкилотлари, ваколатли давлат органлари, қонун ижодкорлиги субъектлари ҳамда ҳуқуқни қўллаш амалиёти вакилларининг хотин-қизлар сиёсий онгини юксалтириш, жамиятда уларнинг фаоллигини янада кучайтириш мақсадида ўтказилди.
Тадбирда парламент иккала палата аъзолари, сиёсий партиялар фаоллари, вазирлик ва идоралар вакиллари, Ёшлар парламенти аъзолари, фаол хотин-қизлар, ОАВ вакиллари ва блогерлар иштирок этди. Тадбирда Олий Мажлис Сенати Раиси, Республика хотин-қизлар жамоатчилик кенгаши раиси Т.Нарбаева иштирок этди.
Т.Нарбаева ўз сўзида ҳозирги вақтда хотин-қизлар мамлакат аҳолисининг қарийб 50 фоизини ташкил этиши, уларнинг барча соҳаларда самарали меҳнат қилишлари, шу жумладан, сиёсий бошқарув, ижтимоий-иқтисодий ҳаётда фаолият кўрсатишлари учун барча шарт-шароитлар яратилгани, сайловларда аёлларнинг ўрни беқиёс экани, бугунги глобаллашув даврида хотин-қизларнинг ҳуқуқ ва эркинликлари, қонуний манфаатларини ҳимоя қилиш, янада мустаҳкамлаш муҳим аҳамият касб этаётганини таъкидлади. Уларнинг ижтимоий-иқтисодий ва сиёсий-ҳуқуқий фаоллигини ошириш давр талабига айланганлигига эътибор қаратди. Ўзбекистонда аёллар сайлов жараёнларининг барча босқичларида фаол қатнашишлари учун эркаклар билан тенг шароитлар яратилганлигини ҳисобга олиб, уларни қўллаб-қувватлаш ҳамда рағбатлантириш сиёсатини кучайтириш муҳим масала эканлигига урғу берди.
Таъкидлаш ўринлики, Конституцияда хотин-қизлар ва эркаклар тенг ҳуқуқлилиги ҳамда фуқароларнинг ўз хоҳиш-иродасини эркин билдириш, умумий, тенг ва тўғридан-тўғри сайлов ҳуқуқлари асосида яширин овоз бериш каби сайлов ҳуқуқларини амалга оширишнинг асосий принциплари мустаҳкамлаб қўйилган. Мазкур конституциявий нормалар эса, 2019 йилда қабул қилинган Сайлов кодексида тўлалигича ўз ифодасини топган.
Аёлларнинг сиёсий ҳуқуқлари тўғрисидаги Конвенцияда ҳам аёллар барча сайловларда, ҳеч қандай камситишларсиз, эркаклар билан тенг шароитларда овоз бериш ҳуқуқи ҳамда миллий қонунчиликда белгиланган тартибда сайланиш ҳуқуқига эга эканлиги белгилаб қўйилган.
Қайд этиб ўтиш керак, Президент сайлови жараёнида аёлларимиз ҳам сайловчи, ҳам президентликка номзод, ҳам сайлов комиссиясининг аъзоси, ҳам кузатувчи, ҳам ишончли вакил сифатида эркаклар билан бирга тенг шароитда ва эркин иштирок этяпти.
Хусусан, бугунги кунда Президент сайловини ўтказувчи округ сайлов комиссиялари аъзоларининг 104 нафари ва участка сайлов комиссиялари аъзоларининг 65 минг 974 нафарини хотин-қизлар ташкил этади.
2019 йил Қонунчилик палатасига бўлиб ўтган сайловда участка сайлов комиссияларининг таркибида 54 минг 361 нафар аёл иштирок этган. Бу йилги рақамлар билан ушбу кўрсаткич солиштирганда 21,3 фоизга ошганлигини кўриш мумкин. Ҳозирги вақтда мамлакатимизда хотин-қиз сайловчилар сони қарийб 11 миллионни ташкил этади.
Бўлажак сиёсий жараёнда хотин-қизларнинг фаоллигини ошириш, уларнинг ўз конституциявий ҳуқуқидан эркин фойдаланиши, ўзлари танлаган номзодга овоз бериши учун зарур шарт-шароитлар яратиш мақсадида маҳаллаларда бир қатор тарғибот тадбирлари ўтказилаётганлиги қайд этилди.
Ватан тақдирига бефарқ бўлмаган хотин-қизларнинг жорий йилги Президент сайловида фаол қатнашиб, янгидан-янги ютуқлар ва муваффақиятларга эришишида ҳар бирининг ҳиссаси борлиги, дахлдор эканлигини юзага чиқаришда кенг жамоатчилик биргаликда ҳаракат қилиши, айниқса, хотин-қизлар жамоатчилик кенгашлари томонидан ҳар бир маҳаллада, қишлоқ ва овулларда, шаҳар ва туманларда хотин-қизларнинг сайловларда фаол иштирокларини таъминлашга қаратилган тадбирларни белгиланган муддат давомида кучайтириш лозимлиги таъкидланди, деб хабар беради Олий Мажлис Сенати матбуот хизмати.
