16 июль куни Фарғона вилоят судида жиноят ишлари бўйича судлов ҳайъатининг апелляция инстанцияси бемор аёлнинг соғлом оёғини ампутация қилиб, унинг ўлимига сабаб бўлган ва 6 май куни Жиноят ишлари бўйича Қува туман судида судланган шифокорнинг апелляция шикоятларини кўриб чиқиб, ажрим берди.
Унда қайд этилишича, судланган шифокор Республика ихтисослаштирилган эндокринология илмий-амалий тиббий маркази Фарғона филиали «Хирургия» бўлими бошлиғи лавозимида ишлаган. У 2024 йил 9 сентябрдан 2024 йил 25 октябрга қадар ўз ҳисобидан таътилда бўлган, бўлим мудири вазифасини вақтинча бажариш бошқа шифокор Д.Р. зиммасига юклатилган
2024 йил 18 октябрда фуқаро А.И. фарзандлари томонидан филиалга олиб келинган. Шу куни шифокор Д.Р. томонидан тиббий кўрикдан ўтказилиб, «Қандли диабет иккинчи тури оғир шакли, декомпенсация босқичи, ДТС нейроишемик шакли, Вангер-4, чап оёқ болдир соҳасида ампутациядан кейинги ҳолат тизза бўғими майдаланиб синиши» ташхиси қўйилган.
Судланган шифокор ўз ҳисобидан таътилда бўла туриб, 2024 йил 18 октябрь куни бўлимга келиб жойлашган бемор А.И.ни даволаш ҳамда жарроҳлик амалиёти ўтказиш ишларидан «Хирургия» бўлимининг вақтинча мудири Д.Р.ни гўёки «тажрибасиз» сифатида кўрсатган ҳолда ўзбошимчалик билан четлатган.
Таъкидланишича, бирор-бир тиббий кўрсатма бўлмагани ҳолда беморни «Чап оёқ сон соҳасини ампутация қилиш» режасини ишлаб чиққан ва тиббий ҳужжатлар тарихига ушбу режани Д.Р. номидан расмийлаштирган.
Судланган шифокор жарроҳлик амалиёти ўтказиш учун танланган тиббий ходимлар таркибига ўзбошимчалик билан ўзгартириш киритиб, ваколатсиз жарроҳни ҳамда тиббиёт университети талабасини филиал раҳбарининг розилигисиз жарроҳлик амалиётида иштирок этишга жалб қилган.
Жарроҳлик амалиёти чоғида эса беморнинг чап сон соҳасини ампутация қилиш ўрнига, тиббий кўрсатма ва беморнинг розилигини олмасдан, бирон-бир касаллик асорати бўлмаган ўнг оёғини сон соҳасидан кесиб ташлаб, кейинчалик чап сон соҳасини ҳам кўр-кўрона ампутация қилган. Бемор А.И. бир вақтнинг ўзида икки оғир турдаги жарроҳлик амалиётини кўтара олмасдан, олган тан жароҳатлари асоратлари оқибатида 2024 йил 7 ноябрда вафот этган.
Шундан кейин Жиноят ишлари бўйича Қува туман судининг 2025 йил 6 майдаги ҳукмига кўра, Жиноят кодексининг 116-моддасининг 3-қисми (Касб юзасидан ўз вазифаларини лозим даражада бажармаслик одам ўлимига сабаб бўлиши) билан Жиноят кодексининг 45-моддаси (Муайян ҳуқуқдан маҳрум қилиш) қўлланиб, 3 йил Соғлиқни сақлаш вазирлиги тизимида раҳбарлик ва шифокорлик вазифасида ишлаш ҳуқуқидан маҳрум қилиниб, 4 йил озодликдан маҳрум қилиш жазоси тайинланган.
Судланган ҳимоячиси билан биргаликдаги апелляция шикоятида, ҳаракатларида жиноят таркиби йўқлиги, А.И.нинг ўлими унинг ҳаракатлари билан боғлиқ бўлмагани ҳақида важлар келтириб, суд ҳукмини бекор қилиб, оқлов ҳукми чиқаришни сўраган. Жабрланувчининг қонуний вакили Р.И. апелляция шикоятида шифокорни Жиноят кодекси 116-моддасининг 4-қисми «б» банди ва 206-моддасининг (Ҳокимият ёки мансаб ваколати доирасидан четга чиқиш) 1-қисми билан айбли деб топишни ҳамда удан 28 995 000 сўм моддий ва 350 000 000 сўм маънавий зарар ундиришни сўраган.
Апелляция инстанциясининг ажрими билан дастлабки суд ҳукми ўзгаришсиз, апелляция шикоятлари қаноатлантирилмасдан қолдирилди.
