"15 декабрь куни маҳаллий вақт билан соат 04:15 да Озарбайжоннинг “Азал” авиакомпаниясининг самолёти Фарғонага келиб қўнди. Боку-Фарғона-Боку йўналишини очган Аирбус А320 борти анъанавий тарзда сув аркаси билан, экипаж ва йўловчилар эса карнай-сурнай садолари остида тантанали равишда кутиб олинди", деб ёзмоқда Uzbekistan Airports.

Қайд этилишча, мунтазам рейслар ҳафтада бир марта – пайшанба кунлари амалга оширилиши режалаштирилган.

Айтиш жоизки, Фарғона Озарбайжон авиаташувчиси парвоз қила бошлаган Ўзбекистондаги учинчи шаҳарга айланди. Бокудан Тошкентга рейслар ҳафтасига икки марта - пайшанба ва якшанба кунлари мунтазам равишда амалга оширилади. Бокудан Самарқандга – сешанба ва пайшанба кунлари.

1992 йилда ташкил этилган "Озарбайжон ҳаво йўллари" ("Азал") йирик авиаташувчи бўлиб, Boeing ва Airbu самолётларининг замонавий паркига эга бўлган, МДҲ мамлакатлари авиация ҳамжамиятида етакчилардан бири ҳисобланади.