Оқ уйдаги учрашувдан сўнг, ўтган йили Тинчлик бўйича Нобель мукофотига сазовор бўлган Мачадо журналистларга Трампга “унинг озодлигимизга бўлган ноёб садоқатини эътироф этиш учун” Нобель медалини “топширганини” айтди. Қисқача баёнотда у шунингдек, Америка Президенти билан учрашув яхши ўтганини ва унинг тарафдорлари Трампга ишонишлари мумкинлигини қўшимча қилди.
АҚШ Президенти Мария Корина Мачадони унга Тинчлик бўйича Нобель мукофотини “топширгани” учун мақтади. “Мария менга ишим учун Тинчлик бўйича Нобель мукофотини топширди. Бу ўзаро ҳурматнинг ажойиб ишораси эди. Раҳмат, Мария!”, деб ёзди Дональд Трамп Truth Socialда.
Учрашув давомида Оқ уй матбуот котиби Кэролайн Ливитт Трамп Мачадо қисқа муддатда мамлакатни бошқариш учун зарур ёрдамга эга эмаслигига ишонишини айтди, деб хабар берди kaktus.media.
Тинчлик мукофотини топширишга масъул Норвегия Нобель институти 9 январь куни Тинчлик бўйича Нобель мукофоти совриндори уни бошқа шахсга топшириши мумкинлигини рад этди. “Нобель мукофоти топширилиши эълон қилингандан сўнг, уни бекор қилиш, бўлишиш ёки бошқа шахсга ўтказиш мумкин эмас. Қарор қатъий ва абадий кучда қолади”, деб таъкидлади институт.
