Таъкидлаш жоиз, "яшил" автотранспорт атмосферага чиқарилаётган СО2 миқдорини сезиларли даражада камайтириш учун ечим сифатида кўрилмоқда. Чунки, дунё миқёсида СО2 эмиссиясининг қарийб 22,7 фоизи транспорт секторининг улушига тўғри келмоқда (Ўзбекистонда – 13,3%).
Шу сабабли «Volvo» ва «Mercedes-Benz» автоконцернлари 2030 йилдан, «Audi» 2033 йилдан, «General Motors» 2035 йилдан «яшил» автомобиллар ишлаб чиқаришга тўлиқ ўтишни режалаштирмоқда.
Электрокардан фойдаланиш жараёнида ажралиб чиқувчи СО2 миқдори нолга тенг бўлгани билан, электр энергиясини ишлаб чиқаришда ҳосил бўлувчи углерод диоксидини назардан четда қолдирмаслик лозим. Хусусан, электр энергияси кўмирдан олинганда атмосферага жуда кўп миқдорда СО2 ажралади.
Сўнгги йилларда Ўзбекистонда ҳам электромобиллар оммалашиб бормоқда. Масалан, 2021 йилда ушбу тоифадаги транспорт воситаларининг импорти 2020 йилга қараганда 6,2 бараварга ошиб, 809 тага етган.
Таҳлилларга кўра, 2020 йилда Ўзбекистон ҳудудида ёнилғида ҳаракатланувчи автотранспортларнинг СО2 эмиссияси 7,69 млн. тоннани ташкил қилган.
Агар мазкур транспорт воситалари энг зарарли ҳисобланадиган кўмирдан олинадиган электр энергияси орқали ҳаракатланган тақдирда ҳам, СО2 эмиссиясини 2,7 млн. тоннага (35,11%) камроқ ҳосил қилган бўлар эди. Маълумот учун, 2,7 млн. тонна СО2 зарарини қоплаш учун 108 миллионта катта дарахт талаб этилади.
Энди ўйлаб кўринг, автомобилингиз сиз ишга бориб келгунингизча қанча СО2 чиқаради? Агар у электромобиль бўлгандачи? Мутахассислар томонидан ишлаб чиқилган калькулятор ёрдамида буни ҳисоблашингиз мумкин.
