Бу ҳақда «Ҳудудгазтаъминот» АЖ маълум қилди.
Рақамларга эътибор қаратадиган бўлсак, қарийб 775 миллион куб метр табиий газ ноқонуний ишлатилган. Ушбу газнинг қиймати нақ 1 триллион 667 миллиард сўмдан ошиб кетган. Бу маблағ соҳа ривожи ва тизимни модернизация қилиш учун ишлатилиши мумкин бўлган жуда катта йўқотишдир.
Суюлтирилган газ йўналишида ҳам вазият анча жиддий бўлиб чиқди. Тезкор тадбирлар давомида газ баллонларини яширинча сақлаш ва ноқонуний сотиш билан шуғулланган 285 та «бункер» фаолиятига чек қўйилди. Натижада 12 мингдан ортиқ маиший газ баллони ва 138 тоннага яқин суюлтирилган газнинг «қора бозор»га чиқиб кетиши олди олинди.
Шунингдек, текширувлар давомида 95 тонна суюлтирилган газнинг очиқчасига талон-торож қилингани ҳам аниқланди. Мазкур ҳолатлар бўйича тўпланган барча ҳужжатлар айбдорларга нисбатан қонуний чора кўриш учун ҳуқуқ-тартибот идораларига топширилган.
Мутахассисларнинг таъкидлашича, газ тармоқларига ўзбошимчалик билан уланиш нафақат давлатга иқтисодий зарар келтиради, балки хавфсизлик қоидаларининг бузилиши туфайли инсонлар ҳаётига ҳам хавф солади.
Шу сабабли «Ҳудудгазтаъминот» АЖ истеъмолчилардан белгиланган тартиб-қоидаларга қатъий амал қилишни сўради.
