Польшанинг Кельце (Kielce) шаҳрида бокс бўйича ёшлар ўртасида жаҳон чемпионати бўлиб ўтди.
Чемпионатда 54 килограмм вазн тоифасида Нигина Ўктамова мамлакатимиз шарафини ҳимоя қилди ва барча рақибаларини мағлуб этди. Ҳал қилувчи финал жангида украиналик Кристина Лакичук устидан 4:1 ҳисобида ғалаба қозонди.
Самарқанд вилояти Иштихон туманида таваллуд топган Нигина Ўктамова ўзбек боксчи қизлари ичида жаҳон чемпионлигига эришган илк спортчига айланди. Ҳозирда у Жиззах давлат педагогика институтининг жисмоний маданият факультети 1-курс талабаси.
